Ti-Oan Fintech ho MSSI Asina Akordu Pagamentu Ba Benefisiáriu Inan Isin-Rua Sira iha RAEOA

Ti -Oan Fintech ho MSSI asina akordu kooperasaun pagamentu cash ba benefisiáriu inan isin-rua sira iha RAEOA. Imajen/MSSI

Díli, 24 Juñu 2026 (RAFA.TL)- Empreza Ti -Oan Fintech ho Ministériu Solidariedade Sosiál no Inkluzaun  (MSSI) asina akordu kooperasaun pagamentu cash ba benefisiáriu inan isin-rua sira iha Rejiaun Administrativa Espesiál Oé-Cusse Ambeno (RAEOA).

Notísia Relevante: Ti-Oan Fintech Nu’udár Aplikasaun Ne’ebé Fásil Halo Transferénsia no Sosa Pulsa Telemóvel ho Pulsa Eletrisidade

Selebrasaun akordu kooperasaun entre Ti-Oan Fitech ho MSSI ne’e halao iha Salaun MSSI, Caicoli, Díli, Tersa (23/06/2026), ho durasaun akordu tinan ida atu bele fasilita pagamentu osan cash ba benefisiáriu sira iha RAEOA hahú husi fulan-Agostu, tinan ne´e.

Ministra Solidariedade Sosiál no Inkluzaun Verónica das Dores, ba Rafa.tl, hateten antes ne’e Ministériu Solidariedade Sosiál no Inklusaun servisu hamutuk ona ho Ministériu da Saúde hodi fasilita inan  isin -rua sira atu halo tratamentu iha sentru saúde sira, nune’e selebrasaun asinatura akordu kooperasaun entre MSSI ho Ti-Oan Fintech  ne’e  atu fasilita estadu fó subsídiu $25 ba inan isin-rua sira atu halo tratamentu iha kada sentru saúde.

“Pagamentu ne’e ba liu inan isin-rua no inan fó susu. Bainhira sira sentru saúde ne’ebé sira identifika ona, inan isin-rua sira ba konsulta, estadu fó $25 kada fulan-tolu atu fasilita sira hodi selu transporte atu ba halo konsulta para mediku sira bele hatene katak inan nia todan ne’e hira, labarik nia todan ne’e hira, nia aas ne’e hira, tanba sira mak bele halo ida ne’e,’’ MSSI Verónica das Dores  hateten.

Iha fatin hanesan, Jerente  Ti-Oan Fintech, Protasio Emanuel da Costa Silva Bacun, haktuir bazei ba  kontratu ne´ebé selebra entre MSSI ho Ti-Oan Fintech  sei halo pagamentu distribuisaun ba benefisiária inan isin-rua sira ne’ebé destaka  iha RAEOA.

“Iha kooperasaun ida-ne’e atu halo pagamentu distribuisaun osan cash ba iha benefisiáriu sira iha RAEOA. Prosesu  pagamentu ida-ne’e ita sei halo pagamentu espesifiku liubá iha ita nia inan isin-rua sira ne’ebé sei destakadu iha sentru saúde idaidak,” Jerente  Ti-Oan Fintech, Protasio Emanuel da Costa Silva Bacun esplika.

Jerente Ti-Oan Fintech informa, iha estimasaun ne’ebé iha hahú iha fulan-Agostu no kona-bá data fiksu ne’e seidauk hetan informasaun klaru husi MSSI, maibé klaru katak sei halo pagamentu ne’e iha fulan-Agostu no pagamentu ida-ne’e sei halo liuhosi Ti–Oan, sei halo pagamentu ba iha benefiasiariu sira konta depois benefisiariu sira sei vizita ajente sira TI-Oan nian ne’ebé   destaka ona iha sentru saúde hodi halo levantamentu osan, bazeia ba informasaun husi MSSI katak osan ne’e sei uza ba iha transporte ba inan isin-rua ne’ebé hala’o tratamentu iha sentru saúde.

Programa subsídiu  ka apoiu kondisional ba inan isin-rua sira ne’e bazeia dekretu-lei númeru 18/2012, no iha Konstituisaun Repúblika Demokrátika Timor-Leste konsagra iha  Artigu 56, sidadaun hotu-hotu iha direitu atu asesu ba seguransa no asisténsia sosiál.

Direitu ida-ne’e reforsa mós iha artigu 18 no 39 Konstituisaun kona-bá protesaun espesiál ba labarik sira hosi família, komunidade no Estadu, nune’e mós protesaun ba família nu’udar sélula bázika sosiedade nian no kondisaun ida ba dezenvolvimentu armoniozu ema nian.

Jornalista: David Gonçalves/Editór: Vito Salvadór