TAF Fasilita Formasaun Ba Feto PNTL Kona-bá Kuidadu Aan no Kuidadu Koletivu

The Asia Foundation (TAF), liuhusi Programa Nabilan, fasilita formasaun ba membru feto PNTL atu hasa'e kapasidade kona-bá kuidadu aan no kuidadu koletivu, Kuarta 5 Agostu 2026.

Díli, 05 Agostu 2026 (RAFA) – The Asia Foundation (TAF), liuhusi Programa Nabilan, Kuarta-ne’e, hahú formasaun ba membru feto Polísia Nasionál Timor-Leste (PNTL) atu hasa’e kapasidade kona-bá kuidadu aan no kuidadu koletivu, hodi hamenus presaun servisu no hadi’a atendimentu ba vítima sira iha kazu violénsia bazeia ba jéneru (VBJ).

Formasaun ne’e hanesan inisiativa konjunta entre Programa Nabilan no Gabinete Jéneru Komandu Jerál PNTL, ne’ebé sei realiza durante loron tolu, husi loron 5 to’o  loron 7 fulan-Agostu 2026.

Partisipa iha atividade ne’e mak polísia feto na’in-26 husi Gabinete Komandu Jerál no komandu Polísia munisípiu sira.

Segundu Komandante Jerál PNTL, Komisária  Assistente Polísia Natercia Eufasia Soares Martins, hateten formasaun ida ne’e responde ba esperiénsia ne’ebé PNTL hasoru durante hala’o servisu, liuliu ba membru sira ne’ebé atende vítima violénsia bazeia ba jéneru.

“Formasaun ida ne’e hanesan inisiativa husi Gabinete Jéneru, haré ba situasaun ne’ebé ita hasoru durante servisu to’o agora. Iha akontesimentu balun ne’ebé hatudu katak membru balun seidauk komprende no seidauk iha vontade atu ko’alia kona-bá sira-nia problema rasik. Situasaun ida ne’e fó impaktu ba sira-nia saúde mentál no bele prejudika atendimentu ba komunidade,” Komisária Assistente Polísia Natercia Eufrasia Soares Martins hateten iha Díli.

Nia esplika katak polísia feto sira la deit hala’o knaar hanesan ofisiál PNTL, maibé mós iha responsabilidade hanesan inan no membro família ida. Tanba ne’e, sira presiza prontu atu kumpre orden husi komandu iha tempu hotu, ne’ebé dala barak hamosu presaun entre responsabilidade servisu no vida familiar.

“Sira mós tenke prontu iha kualker tempu bainhira komandu fó orden atu hala’o misaun. Entaun, kursu ida ne’e importante atu hanorin oinsá kuidadu sira-nia aan no kuidadu malu atu bele kontinua hala’o servisu ho di’ak,” Komisária Assistente Polísia Natercia hateten.

Nia enkoraja membru PNTL feto sira atu buka apoiu husi kolega bainhira hasoru difikuldade iha servisu, tanba kuidadu koletivu bele ajuda hamenus stres no hasa’e kualidade atendimentu ba vítima sira.

Nia akresenta katak Komandu Jerál PNTL planeia inklui matéria kona-bá kuidadu aan no kuidadu koletivu iha kuríkulu formasaun baziku ba rekruta foun sira, atu kultura ida ne’e sai parte husi dezenvolvimentu profisionál membru PNTL iha futuru.

Formasaun ne’e espera bele fortalese kapasidade polísia feto sira atu jere presaun servisu, protege saúde mentál no emosional, no aumenta kualidade atendimentu ba vítima violénsia bazeia ba jéneru iha teritoriu tomak.

Jornalista: João Carlos