Taça da Liga FFTL, Assalam F.C Preparadu no iha Ambisaun Rekolla Pontu Tolu Kontra DIT F.C

Treinadór Assalam F.C Adu Marques Nami Ruru, ho Asistente Treinadór DIT F.C, Jacinto Belo Freitas realiza konferénsia imprensa, Sesta (16/01/2026). Imajen/Rafa.tl

DILI, RAFA.tl– Treinadór Assalam F.C, Adu Marques Nami Ruru hatete, ekipa Assalam preparadu no iha ambisaun rekolla pontu tolu husi DIT F.C iha jogu kontinuasaun Taça da Liga FFTL 2025.

Notísia Relevante: Federasaun Futeból Timor-Leste Lansa Troféu “Taça da Liga” 2025

Treinadór Assalam F.C Adu Marques Nami Ruru, iha konferénsia imprensa ne’ebé hala’o iha Estádiu Munisipál Díli, Sesta (16/01/2026) hatete,  hanesan Treinadór iha ona estratéjia ne’ebé sei fó ba jogadór sira, atu nune’e, bele  rekolla vitória iha jogu kontra ekipa DIT F.C.

‘’Estratéjia no tátika ami iha, maibé ne’e privadu, ita ko’alia jerál de’it, ita labele fó sai, tanba ita-nia adversáriu tur iha sorin, ne’ebé ami iha estratéjia ketak ida  no  iha maneira rasik hodi halo oinsá mak tenke manán sira iha ami nia jogu primeiru hodi hetan pontu tolu,” Treinadór Assalam F.C, Adu Marques Nami Ruru hateten.

Treinadór ne’e hatutan, ekipa Assalam F.C mós iha preparasaun másimu hodi hatudu jogu ne’ebé furak hodi anima adeptu sira iha minutu 90 kontra DIT F.C iha Estádiu Munisipál Díli, Domingu (18/01/2026).

Asistente Treinadór DIT F.C, Jacinto Belo Freitas afirma, maske nia ekipa ladún halo preparasaun másimu, maibé iha esperansa hodi halakon ekipa Assalam F.C.

‘’Preparasaun ladún másimu tanba depois inan tuan liubá ita sei férias kleur depois ita hahú fila-fali treinu iha fulan-Janeiru ne’e, ne’ebé ita bele dehan pursentu 60 de’it, maibé DIT F.C iha esperansa atu manán iha jogu primeiru ne’e,” Jacinto Belo Freitas hateten.

Asistente treinadór ne’e garante sei halakon Assalam F.C tanba, ekipa DIT FC ha esperiénsia ona ba jogu no liga sira iha Timor-Leste.

Nia hatutan, DIT F.C mós la’ós klubu ne’ebé mak bai-bain, maibé klubu ne’ebé mak kada tinan ne’e sempre kompete ona iha liga no iha taxa sira, no kopa sira mós kompete beibeik ona, ne’ebé DIT F.C la’ós ona klubu ki’ik-oan, ne’ebé bele dehan nia bele kompete ho Assalam, no fiar katak bele manán Assalam.

Iha jogu Taça da Liga FFTL 2025 ne’e  ekipa DIT F.C sei reforsa husi jogadór estranjeiru na’in rua, no husi  jogadór rua ne’e, ida antes ne’e hala’o ona nia jogu ho ekipa DIT F.C no ekipa Assalam F.C sei reforsa husi jogadór estranjeiru na’in rua husi Atambua-Indonézia, Nusa Tenggara Timur.

Reportajen ekipa Rafa.tl