Jogadora S’amuser F.C Na’in-Tolu Rekolla Títulu Individu Durante Jogu LTFF

Jogadora S'amuser na'in-tolu hetan títulu individu tolu ho osan kada jogadora US$500.00

DÍLI, RAFA.tl – Jogadora ekipa S’amuser F.C na’in-tolu rekolla títulu individu tolu durante jogu Liga Timorense Futeból Femenino (LTFF) époka 2025/2026, hanesan Mellor jogadora Senior (Best Player) ne’ebe hetan husi Farelia Seriano, Jogadora foin-sa’e di’ak liu (Best young Player) hetan husi  Nivia Ximenes no guarda rede di’ak liu (Best goalkeeper) hetan husi  Madelena Lucia de Fatima Soares.

Notísia Relevante: S’amuser F.C Kampiaun LTFF Hafoin Empate Kontra A.D S.L.B Laulara ho Skor 0-0

Jogadora na’in-tolu ne’ebé hetan prémiu individu hanesan medalla ho mós osan ho montante US$500.00 kada jogadora,  bazeia ba sira-nia performa durante joga iha LTFF no avaliasaun dezempeñu husi komisaun no órgaun LTFF.

Hafoin simu títulu mellor jogadora  seniór, Farelia Seriano, ba jornalista sira iha kampu Federasaun Futeból Timor-Leste (FFTL), Domingu (22/03/2026), hato’o agradese ba apoiu tomak husi ekipa, liuliu ba família no nia kompromete ba oin esforsu liutaán hodi bele mantein títulu referida iha époka tuir mai.

“Ha’u sente kontente, tanba foin primera-vez marka istória iha tinan ida-ne’e, tara medalla mellor jogadora ,” Farelia Seriano hateten.

Farelia Seriano oferese medalla ne’e  ba nia pai no mãe no mós ba kolega jogadora sira hotu husi ekipa S’amueser F.C ne’ebé sempre apoiu malu.

Jogadora foin-sa’e di’ak liu (Best young Player),  Nivia Ximenes orgullu ho títulu ne’ebé hetan no nia didika  títulu ne’e espesiál ba família tanba durante ne’e família mak sai ponte ba nia kareira futeból.

“Husi kiik to’o boot, pai ho  mãe suporta ha’u, ne’ebé premiu ne’e há’u dedika ba pai ho mãe,” Nivia Ximenes haktuir.

Iha fatin hanesan mellor Guarda Rede, Madelena Lucia de Fatima Soares, hato’o agredese ba apoiu tomak husi família, kolega, liuliu ba ekipa S’amuser hodi bele atinze mehi ne’ebé iha no husu ba FFTL atu kontinua realiza kompetisaun futeból feminino, atu nune’e, labele hamate talentu futebolista femenino iha rai laran.

“Ha’u sente treinador hanorin diak tebes, ne’e mak ohin loron ha’u bele hetan títulu guarda rede di’ak liu. Ha’u nia mensajen labele hamate futeból feto, nafatin mantein, tanba feto mós bele sai jogadoraba nia klube no mós ba nasaun,” Madelena Lucia de Fatima Soares tenik.

Iha jogu finál entre ekipa S’amuser F.C ho A.D S.L.B Laulara finaliza ho rezultadu empate ho skor 0-0 no rezultadu ne’e lori  S’amuser F.C sai kampiaun ba liga futeból femenino 2026 ho pontu 45 kompara ho AD SLB Laulara ne’ebé iha de’it pontu 43.

Reportajen ekipa Rafa.tl