Sorumutuk Konsellu Ministru CPLP Diskute Mós Akordu Administrativu Ba Aplikasaun Konvensaun Multilaterál Seguransa Sosiál

Abertura sorumutuk Konsellu Ministru iha Díli, Kuarta 12 Agostu 2026.

Díli, 12 Agostu 2026 (RAFA)- Sorumutuk ordinária ba dala-XXXI, Konsellu Ministru husi nasaun sira Ko’alia Lian Portugés (CPLP) diskute mós akordu administrativu ba aplikasaun konvensaun multilaterál seguransa sosiál ba reforsa protesaun sosiál no portabilidade direitu seguransa sosiál sidadaun sira iha espasu komunidade nian.

Iha Kuarta-ne´e, Konsellu Ministru hala’o reuniaun iha Palasiu Governu, Dili, no asiste aprezentasaun husi Ministru Negosiu Estranjeiru no Kooperasaun, Bendito dos Santos Freitas, kona-bá Reuniaun Ordinária  ba dala-XXXI Konsellu Ministru CPLP ne’ebé  realiza iha Díli iha loron 19  fulan-Agostu 2026, iha ámbitu Prezidénsia Pro Tempore Timor-Leste nian.

Reuniaun ne’e sei sai momentu importante ida hodi hakle’an koordenasaun (konsertasaun) polítiku-diplomátika no kooperasaun entre Estadu-membru sira, ne’ebé aliña ho tema Prezidénsia Timoroan nian, “Konsolidasaun Estadu Direitu Demokrátiku no Dezafiu sira CPLP nian”.

Entre asuntu prinsipál sira iha ajenda maka situasaun iha Guiné-Bisau, preparasaun ba Prezidénsia CPLP tuirmai no definisaun ba orientasaun estratéjika Organizasaun nian ba tinan oin mai.

Sorumutuk ne’e mós sei diskute akordu administrativu ba aplikasaun konvensaun multilaterál seguransa sosiál CPLP, ne’ebé ho objetivu atu reforsa protesaun sosiál no portabilidade direitu seguransa sosiál sidadaun sira iha espasu komunidade nian.

Aleinde ne’e sei diskute mós deklarasaun kona-ba “Konsolidasaun Estadu Direitu Demokrátiku no Dezafiu sira CPLP nian”, ne’ebé reafirma kompromisu Estadu membru sira ho prinsípiu demokrátiku, estadu direitu no reforsu koordenasaun polítiku diplomátika.

Jornalista: Zita Menezes