SM Rejeita Fasilita Sidadaun Estranjeiru Sira Halo Atividade Ilísitu iha Timor-Leste

Diretór Ezekutivu Servisu Migrasaun, Komisariu Asitente Jorge Monteiro, rejeita informasaun ne’ebé espalla iha media sosial kon-bá pesoal no dirijente sira Servisu Migrasaun fasilita vistu ba sidadaun estranjeiru hodi halo atividade ilegál.

Díli, 16 Jullu 2026 (RAFA.TL)- Diretór Ezekutivu Servisu Migrasaun, Komisariu Asitente Jorge Monteiro, rejeita informasaun ne’ebé espalla iha media sosial kon-bá pesoal no dirijente sira Servisu Migrasaun fasilita vistu ba sidadaun estranjeiru hodi halo atividade ilegál liu-liu iha relasaun ho jogu ilísitu no fraude online iha Timor-Leste.

Komisáriu Asitente Jorge Monteiro husu sidadaun sira aprezenta faktu ba Ministériu públiku (MP) hodi lori ba prosesu kriminál tuir lei ne´ebé vigora karik iha prova kona-bá pesoál Servisu Migrasaun envolve iha atividade ílisitu sira-ne’e.

“Relasiona ho informasaun falsu ne’ebé hatete Servisu Migrasaun fasilita no apoiu atividade sira, relasiona ho scam call centre  no atividade sira seluk ne’ebé relasaun ho operasaun atuál. Lori Migrasaun agradese ba informasaun hirak ne’e, bele sai informasaun atu fanun ita hodi nune’e ita bele kuidadu, tau atensaun iha ita nia dezempeñu servisu diária nian, ne´ebé ha´u  mós enkoraja ba ema hotu-hotu inklui jornalista sira iha faktu, evidénsia ne’ebé minimu, iha indisiu ruma ne’ebé ita iha bele ba hato’o keixa iha parte PNTL iha DSIK nian, PCIC, no mós Ministeriu Publiku, atu nune’e bele loke prosesu investigasaun kriminál,” Komisariu Asistente  Polísia Jorge Monteiro ba jornalista sira iha Ministeriu Interiór, Kinta-ne´e.

Nia dehan sidadaun sira ne’ebé iha informasaun relevante tenke lori ba autoridade kompetente, tanba evidénsia mak sai baze prinsipál ba investigasaun no prosesu judisiál, atu ema ne’ebé sala hetan responsabilidade tuir lei.

Diretór Ezekutivu Servisu Migrasaun mós rejeita kona-ba informasaun ne´ebé hatete nia halo desmantelasaun ba Sistema Migration Information Data Analysis System (MIDAS) para bele prezudika kontrolu  movimentu estranjeiru tama sai iha teritoru Timor-Leste.

Komisáriu Asistente Polísia ne’e esklarese katak, antes ne’e Servisu Migrasaun instala ona sistema migration informasion data Analysis System (MIDAS) ne’e iha pontu entrada hanesan Aeroportu Internasionál Prezidenti Nicolau Lobato, Postu Fronteira Salele, Postu Fronteira Batugade no Postu Fronteira Sakato Oé-Cusse. Ne´ebé sei deside aumenta tan midas iha pontu entrada Ataúro, Portu Tibar B no Postu Fronteira Bobometo Oé-Cusse.

Ligadu ba operasaun ne´ebé realiza ho PNTL, liu husi  Diresaun Servisu Investigasuan Kriminál (DSIK) no Polísia Sientifiku Investigasaun Kriminál (PCIC, sigla portugés) halo hodi desmantela fatin sira ne’ebé sai knuk ba jogu Scam Call Centre no  online game iha Manleuna, Metiaut, ho Bebonuk ho sira seluk ne’e, rejultadu husi komunikasaun, koordenasaun no kooperasaun institusional.

Jornalista: João Carlos/Editór: Vito Salvadór