SG FRETILIN Agradese Lú-Olo Nia Lideransa Durante Tinan 25 iha FRETILIN no Hakribiit Korrupsaun To’o Mate

Sekretáriu Jerál FRETILIN, Mari Alkatiri ho espoza fó omenajen ikus ba Saudozu Lú-Olo. Imajen/Espesiál

Díli, 26 Juñu 2026 (RAFA.TL)- Sekretáriu Jerál (SEG, sigla portugés) Partidu FRETILIN Marí Alkatiri, iha CCF, Comoro Sesta (26/06/2026), hato’o agradese no elojia Prezidente Partidu FRETILIN Saudozu Francisco Guterres “Lú-Olo” nia lideransa durante tinan 25 iha FRETILIN hodi kuda no hamoris prinsipiu sira demokratika no hakribiit korrupsaun too mate.

Sekretáriu Jerál Partidu FRETILIN Marí Alkatiri haktuir, prezidente partidu FRETILIN Saudozu Francisco Guterres “Lú-Olo” mai husi familia simples ida, maibé ho dignidade boot, saudozu aprende husi familia simples no ki’ak hodi hadomi no hametin paz no lidér puro ne’ebé hakribiit korrupsaun.

“Nu’udár fundadór FRETILIN orgullu boot ida, no ha’u husu ba familia atu iha mós orgullu ba aman ida hanesan ne’e, ba kaben ida hanesan ne’e, tiu ida hanesan ne’e, ba pai ida hanesan ne’e. Ha’u hatene’e katak ita iha laran susar, ha’u rasik todan boot ida mak iha ha’u nia kabaas, maibé ha’u prontu simu ida-ne’e ha’u prontu tanba nia faan nia vida tomak ba ida-ne’e, ha’u prontu simu todan ida-ne’e,” Sekretáriu Jerál Partidu FRETILIN Marí Amude Alkatiri hateten iha CCF.

Fundadór RDTL ne’e  husu  povu hotu atu banati tuir karaktér simplesidade ne’ebé Saudozu Francisco Guterres “Lú-Olo” husik hela ba povu ida-ne’e. Husu de’it para iha tempu susar ne’e la buka sala, buka intendimentu, la fó sala ba malu, buka atu hametin liután unidade entre familia sira. Tanba ne’e kamarada Lú-Olo hadook aan ne’e fizikamente, maibé sei hamutuk nafatin ho povu Timor-Leste tomak

“Obrigada kamarada Lú tanba ita-boot hatudu ita nia simplesidade, ami sei banati tuir no hametin liután karatér ida-ne’e,” tenik Marí Alkatiri.

Tuir observasaun Rafa.tl iha tereñu haré katak iha vizita ikus saudozu Prezidente Partidu FRETILIN Saudozu Francisco Guterres “Lú-Olo”  nia isin mate iha CCF ne’e hetan partisipasaun antuziasmu husi militante Partidu FRETILIN, estudante sira no povu bai-bain ne’ebé forma naruk iha dalan CCF nia to’o iha kuartél jeral F-FDTL hodi fó sira nia omenajén ikus ba grande erói.

Iha dalan protokolu  hetan seguransa maixmu husi Polisia Nasionál Timor-Leste  (PNTL) Polisia tranzitu  iha dalan  protokolu ne’ebé Saudozu Francisco Guterres “Lú-Olo”  nia isin mate liu ba.

Jornalista : Zita Menezes/Editór: Vito Salvadór