Servisu Migrasaun Tenke Kontrola ho Rigor Sidadaun Estranjeiru Ne´ebé Tama Teritóriu TL

Diretór Ezekutivu Fundasaun Mahein, Nelson Belo.

Díli, 29 Setembru 2026 (RAFA) – Diretór Ezekutivu Fundasaun Mahein, Nelson Belo, husu ba Servisu Migrasaun atu aumenta kontrolu no halo verifikasaun ho rigor ba sidadaun estranjeiru sira ne’ebé tama mai Timor-Leste, liuliu iha pontu entrada sira, hanesan Aeroportu Internasionál Presidente Nicolau Lobato no mos iha Fronteira Batugade, Motamasin no mós Sakato no area seluk iha Teritoriu nasionál.

Diretór ezekutivu Fundasaun Mahein, Nelson Belo ba RAFA, Tersa-ne´e, hatete aeroportu no Fronteira terreste sira sai hanesan odamatan prinsipál ba sidadaun estranjeiru sira atu tama mai iha teritoriu nasionál. Tanba ne’e, kontrolu iha pontu entrada tenke hala’o ho rigor, liuliu verifikasaun dokumentu no objetivu sira nia entrada.

“Aeroportu ne’ebé sai odamatan boot ba ema estranjeiru tama mai iha territóriu nasionál, tenke iha inspeksaun maka’as. Presiza halo verifikasaun dokumentu ho rigor. Bainhira sira tama mai ho informasaun ka objetivu ne’ebé la klaru, tenke haruka fila tuir prosedimentu ne’ebé aplika,” hatete Nelson Belo.

Diretor Ezekutivu ne´e mos husu Servisu Migrasaun atu kontinua halo monitorizasaun ba atividade sidadaun estranjeiru sira durante sira hela iha Timor-Leste, inklui verifikasaun dokumentu, objetivu tama, autorizasaun no atividade ne’ebé sira hala’o.

Tuir Nelson Belo presija halo  kontrolu ne’ebé forte no sistemátiku bele ajuda autoridade sira atu prevene utilizasaun sala dokumentu migrasaun, atividade ilegál no krime transnasionál ne’ebé bele afeta seguransa no ordem públika iha Timor-Leste. No Servisu Migrasaun presiza hametin koordenasaun ho PNTL, Alfândega no instituisaun relevante sira seluk, liuliu iha partilla informasaun no halo kontrolu hamutuk bainhira iha indikasaun kona-ba atividade kriminál ka violasaun ba lei.

Nelson Belo fó hanoin ba autoridade kompetente sira atu asegura katak prosesu kontrolu ba sidadaun estranjeiru hala’o tuir lei, ho transparénsia no respeitu ba direitu umanu, maibé nafatin fó prioridade ba seguransa nasionál no manutensaun ordem públika.

Antes ne’e, Servisu Migrasaun informa kona-ba dadus  durante períodu fulan Janeiru to’o Agostu 2026, rejista sidadaun estranjeiru hamutuk 282.304 ne’ebé tama iha territóriu nasionál, husi nasaun hamutuk 198. No Husi númeru ne’e, Servisu Migrasaun mos informa katak atividade migrasaun kontribui ba reseita Estadu ho montante hamutuk US$2.945.350,00.

Jornalista: João Carlos / Juvinal Cabral