Servisu Migrasaun Sei Aplika Koima Ba Empreza Ne’ebé Fó Servisu Ba Sidadaun Estránjeiru ho Vistu Turista

Diretór Ezekutivu Servisu Migrasaun (SM) Komisáriu Asistente Polísia, Jorge Monteiro.

Díli, 17 Setembru 2026 (RAFA)- Diretór Ezekutivu Servisu Migrasaun (SM) Komisáriu Asistente Polísia, Jorge Monteiro hateten, individu ka empreza ne’ebé transporta ka lori sidadaun estranjeiru mai Timor-Leste atu halo servisu ho vistu turista sei hetan koima entre US$750.00 to’o US$1,500.00, enkuantu ba sidadaun estranjeiru rasik sei selu koima hahú husi US$200.00 to’o US$540.00.

Komisáriu Asistente Polísia Jorge Monteiro esplika, relasiona ho númeru sidadaun sira ne’ebé viola sira nia vistu, ezemplu sira utiliza vistu turista atu mai halo atividade turista iha Timor mais sira utiliza hodi halo fali atividade negósiu ka  atividade traballu, maka Servisu Migrasaun sei aplika  sansaun tuir lei mak vigora.

Diretór Ezekutivu  Servisu Migrasaun (SM) Komisariu Asistente Polísia Jorge Monteiro, ba jornalista sira iha Edifisiu Ministériu Interiór (MI), Díli Kinta-ne’e, relata katak hosi total 282.304 sidadaun estranjeiru ne’ebé tama iha territóriu nasionál Timor-Leste durante períodu Janeiru to’o Agostu 2026, maioria tama ho vistu turista.

Durante períodu Janeiru to’o Agostu 2026, Servisu Migrasaun rejista sidadaun estranjeiru 311 ne’ebé viola kondisaun vistu, liu-liu sira ne’ebé tama ho vistu turista ,maibé halo atividade servisu ka negósiu.

Ba violasaun sira-ne’e, Servisu Migrasaun aplika multa, tuir gravidade no kondisaun kazu. Valor multa ba violasaun vistu varia entre US$200.00 to’o US$540.00, tuir dispozisaun Lei Migrasaun.

Nia hatutan, sidadaun estranjeiru ne’ebé iha kapasidade atu selu multa, sira tenke kumpre obrigasaun administrativa ne’ebé determina hosi autoridade kompetente. Enkuantu ba sira ne’ebé la iha kapasidade ka posibilidade atu selu multa, Servisu Migrasaun bele aplika medida abandona voluntáriu hosi territóriu nasionál Timor-Leste, tuir prosedimentu legal ne’ebé vigora.

Komisáriu Asistente Polísia Jorge Monteiro subliña katak sansaun ne’e aplika separadamente ba sidadaun estranjeiru ne’ebé viola kondisaun vistu no ba individu ka kompañia ne’ebé lori ka transporta sira mai atu halo atividade servisu.

Jornalista: Juvinal Cabral dos Santos