Servisu Migrasaun Asegura Sidadaun Estranjeiru Na’in-Lima Uza Vistu Turista Halo Servisu Komersiál

Servisu Migrasan asegura sidadaun estranjeiru feto na’in-lima iha fatin karaoke ida iha área Hudi Laran, Bairu-Pite, Díli, Tersa-madrugada 11 Agostu 2026.

Díli, 11 Agostu 2026 (RAFA)– Servisu Migrasaun (SM) Timor-Leste, Tersa-ne’e, asegura sidadaun estranjeiru feto na’in-lima iha fatin karaoke ida iha área Hudi Laran, Bairu-Pite, Díli, tanba  alegadamente uza vistu turista hodi halo atividade komersiál ne’ebé hetan lukru, no viola Lei Migrasaun no Azilu Artigu 143.

Operasaun Servisu Migrasaun (SM) hala’o iha otelaria no fatin karaoke sira iha Kapitál Díli, Tersa madrugada,  hale’u tuku 01:00 Otl,  konsege lokaliza no asegura sidadaun estranjeiru na’in-lima ne’e.

Iha komunkadu ofisiál ne’ebé RAFA asesu haktuir autoridade Seguransa Servisu Migrasaun halo verifikasaun ba pasaporte no rejistu vistu liuhosi Sistema Jestaun Fronteira, hatudu katak vistu husi sidadaun estranjeiru na’in-lima ne’e mate ona.

Iha prosesu identifikasaun, investigador Servisu Migrasaun sira konklui katak sidadaun sira ne’e tama ho vistu turista maibé uza hodi buka servisu komersiál.

Ba kazu ne’e, autoridade sei aplika sansaun koima tuir Artigu 143, nune’e mós ba sira ne’ebé rekuza atu selu, Servisu Migrasaun sei submete sira nia naran ba Ministériu Públiku atu prosesa tuir lei ne’ebé vigora.

Jornalista: Juvinal Cabral dos Santos