Servisu Migrasaun Asegura Sidadaun Estranjeira Na’in-10 Viola Vistu

Ekipa Servisu Migrasaun asegura sidadaun estranjeiru na'in-10 iha fatin Karauke balun iha área Hudi-Laran, Díli. Imajen/Espesiál

Díli, 14 Agostu 2026  (RAFA)- Operasaun rutina husi ekipa Servisu Migrasaun (SM), Kuarta-Kinta kalan,  hale’u tuku 12:44 kalan to’o tuku 03:00 dadeer Otl, ba fatin karaoke ida iha área Hudi-Laran, asegura sidadaun estranjeira na’in-10 ne’ebé utiliza vistu turista maibé halo atividade komesiál.

Iha komunikadu ofisiál ne’ebé RAFA asesa haktuir, autoridade seguransa Servisu Migrasaun halo verifikasaun liuhosi Sistema Jestaun Fronteira, deteta katak iha sidadaun estranjeiru na’in -hitu mak halo violasaun ba kondisaun vistu, tanba sira uza vistu turista hodi hala’o fali atividade komersial. Enkuantu na’in-tolu seluk maske ho vistu traballu nian, maibé uza vistu la tuir fatin servisu nian.

Ekipa investigador Servisu Migrasaun sira deskobre katak sidadaun estranjeiru hirak ne’e uza sala vistu hodi buka lukru, ne’ebé la tuir objetivu no kondisaun vistu ne’ebé fó ba sira.

‎Hafoin deteta violasaun ne’e, ekipa operasaun Servisu Migrasaun halo planeamentu no buka tuir sidadaun hirak ne’e to’o konsege lokaliza no asegura sira iha fatin karaoke ida iha área Hudi Laran.

‎Sidadaun estranjeiru na’in-10 agora hela iha kontrolu Servisu Migrasaun atu halo verifikasaun no prosesa tuir prosedimentu lei migrasaun ne’ebé vigora iha Timor-Leste.

‎Servisu Migrasaun kontinua halo fiskalizasaun ba sidadaun estranjeiru atu asegura katak sira kumpre ho regra migrasaun, inklui uza vistu  tuir objetivu ne’ebé autorizadu no la halo atividade ne’ebé kontra lei Migrasaun Timor-Leste nian.

Jornalista: Juvinal Cabral dos Santos

‎