Serimónia Funebre Saudozu Lú-Olo, Governu Dekreta Toleránsia Pontu Loron Tomak

Timoroan rihun hato'o sentidu triste ba falesimentu eis-PR Lú-Olo.

Díli, 25 Juñu 2026 (RAFA.TL) – Primeiru-Ministru interinu dekreta ona toleránsia pontu ba loron tomak,  Sesta, 26 Juñu 2026, tanba serimónia funerál eis-Prezidente Repúblika Francisco Guterres “Lú-Olo”, ne’ebé sei hakoi iha Jardín Eroi Metinaro.

Funsionáriu públiku sira livre atu fó omenajen ba eis-Prezidente; kortézu saudozo nia restos mortais  sei liu Farol, Komité Sentral FRETILIN (CCF), Kuartél-Jerál F-FDTL, Palásiu Prezidensiál, Katedrál no Parlamentu molok ba haloot iha Metinaro.

Medida ne’e, publika iha despasu ofisiál, abranje funsionáriu, ajente no traballadór hotu-hotu iha administrasaun direta Estadu nian — servisu sentrál no deskonsetradu — nune’e mós organizmu administrasaun indireta nian, ne’ebé hakarak fó omenajen ikus ba Eroi Nasionál ne´e.

Traballadór hosi servisu públiku ne’ebé nia natureza ezije funsionamentu nafatin iha loron ne’e la tama iha toleránsia pontu. Dirijente másimu sira tenke garante dispensa hanesan iha data seluk, la prejudika kontinuidade no kualidade servisu públiku nian.

Kortézu funerál sei kumpre itineráriu tuirmai iha Sesta, 26 Junhu:

07h30: Sai hosi rezidénsia iha Farol, Díli

07h50 – 08h40: Omenajen iha Komité Sentrál FRETILIN, partidu ne’ebé Lú-Olo prezide dezde 2001

08h50 – 09h00: Onra militár iha Kuartél-Jerál F-FDTL, Fatuhada

09h05 – 09h50: Serimónia iha Palásiu Aitarak Laran, fatin ne’ebé nia servisu nu’udar Xefe Estadu entre 2017 no 2022

10h00 – 11h30: Misa isin-mate nian iha Katedrál Díli

12h00 – 12h30: Omenajen iha Parlamentu Nasionál

13h45: Hahú serimónia hakoi nian iha Jardín Eroi sira, Metinaro, ho durasaun indeterminada

Timor-Leste kumpre lutu nasionál ne’ebé Governu dekreta, sei vigora to’o tuku 23h59 Sábadu, 28 Juñu ne’e. Bandeira sira iha edifísiu públiku hotu sei iha meia-haste.

Lú-Olo, ho tinan 71, hakotu nia peregrinasaun iha loron 21 fulan Juñu ne’e, iha Hospital Prince Court, Kuala Lumpur, Malázia, fatin ne’ebé nia halo tratamentu médiku. Nia nu’udar komandante FALINTIL, eis-Prezidente Parlamentu Nasionál no eis-Prezidente Repúblika Timor-Leste nian.

Jornalista: Mateus Romário da Silva Lopes