Noticias

Semitériu Públiku Munisípiu Díli Sei Muda Ba Metinaro

todayOctober 26, 2026 42

Background
share close

Díli, 26 Outubru 2026 (RAFA) – Semitériu foun ne’ebé uluk harii iha Metinaro prepara ba vítima COVID-19 sei uza substitui semitériu públiku Bekusse bainhira iha fatin refere la sufisiente atu simu restu mortál foun.

Prezidente Autoridade Munisípiu (PAM) Díli, Francisco dos Santos, informa katak  autoridade munisipál sei la autoriza atu halot tan restu mortál foun iha Semitériu Públiku Bekusse bainhira espasu iha ne’ebá nakonu ona.

Nia mós orienta ona ekipa sira atu haree no monitoriza konstrusaun rate foun iha Metinaro, ne’ebé sei sai alternativa ba semitériu públiku iha kapitál.

“Ba ita hotune’ebé maka familia mate karik, hotu-hotu sei ba halot iha Metinaro. Ami ba observa konstrusaun seidauk remata, no mós fatin mahon seidauk iha. Maibe, hakarak ka lakohi, ita la iha espasu ona, atu halot iha semitériu Bekusse,” PAM Díli, Francisco dos Santos informa  ba jornalista sira, iha edifísiu Autoridade Munisípiu Díli, Segunda-ne’e.

Nia esplika katak família sira ne’ebé hakarak halot sira-nia membru família iha semitériu sira seluk iha Díli, hanesan Becusse, Bidau Santa Ana, Santa Cruz no Cacau Lidun, sei bele halo tuir kondisaun no espasu ne’ebé disponivel. Maibé, nia medida ne’e la’ós atu aumenta espasu semitériu, maibé atu permite halot restu mortál foun iha fatin ne’ebé disponivel, inklui liu husi uza fila-fali fatin ne’ebé iha ona, tuir prosedimentu ne’ebé aplika.

PAM  Díli mós admite katak konstrusaun rate foun iha Metinaro seidauk kumpre kondisaun hotu atu bele uza hanesan semitériu públiku. Tanba ne’e, autoridade munisipál husu ona ekipa responsavel sira atu aselera prosesu konstrusaun, hodi bele responde ba nesesidade komunidade nian.

Fransisco dos Santos hatutan área ne’ebé prepara atu sai semitériu foun iha Metinaro mak fatin ne’ebé uluk destina ba halot restu mortais  pasiente COVID-19 ho luan kuaze hektare 10.

“Ita haree fatin iha Metinaro ne’e sai preokupasaun. Tanba konstrusaun seidauk avansa di’ak atu bele uza hanesan semitériu. Ami hein katak Ministériu Administrasaun Estatal  bele aselera projetu sira ne’e, tanba ami-nia knaar mak atu halo supervizaun ba servisu sira,” afirma PAM Dili ne’e.

Iha parte seluk, Autoridade Munisípiu Díli informa ona liu husi karta sírkular kona-bá oráriu ba família sira no vizitante ne’ebé hakarak lori ai-funan ka vizita semitériu iha Bekusse.

Tuir informasaun ne’ebe RAFA asesu oráriu ba vizita sei hahú hosi tuku 7:00 dadeer to’o tuku 7:00 kalan, oras Timor-Leste.

Autoridade Munisipál mós refere ba Dekretu-Lei Nú. 3/2016, ne’ebé hetan alterasaun liu husi Lei Nú. 3/2025, loron 15 fulan Outubru.

Jornalista: Remigia Locatelli

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!