SEKOOP Halibur Nia Funsionáriu 400 Diskute Estabelesimentu Kooperativa

Sekretáriu Estadu Kooperativa, Arsénio Pereira da Silva.

Díli, 13 Agostu 2026 (RAFA) — Sekretaria Estadu Kooperativa (SEKOOP), Kinta-ne’e, iha Díli, ‘halibur’ sira-nia funsionáriu  kauze 400 hodi  hala’o  konsultasaun   ba proposta  estabelese grupu kooperativa funsionáriu SEKOOP.

Sekretáriu Estadu Kooperativa, Arsénio Pereira da Silva informa katak funsionáriu hotu-hotu konkorda atu estabelese kooperativa tuir prosedimentu no prosesu ne’ebé eziste, to’o simu tomada de posse no rejistu iha notariadu.

“Funsionáriu hotu-hotu konkorda katak SEKOOP tenke iha kooperativa funsionáriu,” Sekretáriu Estadu Arsenio informa.

Nia hatutan kooperativa funsionáriu ne’e bele sai mekanizmu ida atu reforsa konfiansa públiku no ajuda funsionáriu sira iha situasaun nesesidade urjente, liuliu ba funsionáriu sira ne’ebé simu salariu mínimu.

“Atu fasilita membru sira hotu, tanba saláriu kiik mais kuandu presiza nesesidade ruma iha kooperativa bele atende,’’ Arsenio Pereira da Silva hateten.

Governante ne’e mós esplika kooperativa funsionáriu tenke iha estatutu, regulamentu no rejimentu rasik, tuir Dekretu-Lei Nú. 37/2023 kona-ba kooperativa.

Iha  mandatu  SEKOOP  ne’e nian kontinua fó apoiu ba dezenvolvimentu kooperativa iha área oioin, inklui uniaun kreditu, agrikultura, peska, multisetorial, produsaun no área seluk.

Tuir dadus ne’ebé SEKOOP aprezenta, kooperativa sira ne’ebé eziste  envolve ona membru ativu hamutuk  41.000 iha territóriu nasionál.

Jornalista: Remigia Locatelli