SEKOOP Apoia Ona Subvensaun Públika Millaun 1.8 USD Ba Grupu Kooperativa

SEKOOP Arsénio Pereira da Silva kolleta Bafo Kayrala husi grupu kooperativa Grupu “Lalamu Laman” iha Lautem. Imajen/dok.Espesiál

Díli, 13 Agostu 2026 (RAFA)- Iha tinan 2025,  Sekretária Estadu Kooperativa (SEKOOP) apoia ona orsamentu subvensuan públika ho montante millaun 1.8 USD ba grupu kooperativa ne’ebé elizivel tuir rekizitu aplikavel.

Sekretáriu Estadu Kooperativa  (SEKOOP), Arsénio Pereira da Silva, hateten  grupu kooperativa sira ne’ebé maka SEKOOP rejista  hamutuk 274 ho nia membru liu ema 41.000 ne’e mai ho área oi-oin  hanesan, uniaun ba kreditu, agrikultura, multisetoral, produsaun no área seluk tan.

“Antes apoiu ne’e ita nia diploma ministeriál ne’e ita estabelese komisaun ida hanaran subvensoins públika, hodi nune’e  sira halo avaliasaun ba proposta hafoin halo sosializasaun iha kampu hodi observa, ida ne’ebé elizivel, maka rekomenda mai hodi aprova hodi fó apoiu ba sira kuaze ita halo balansu la’os kooperativa hotu,’’ Sekretáriu Estadu Arsénio Pereira da Silva  informa,  Kinta-ne’e, iha Díli.

Nia hatutan, apoiu sira ne’ebé maka durante ne’e SEKOOP investe ba iha grupu kooperativa ne’e la’os akumula hotu grupu kooperativa iha teritoriu nasionál.  Maibe,  iha munisípiu 13 inklui Rejiaun Administrativa Oé-Cusse Ambeno  ne’ebé  reprezenta deit grupu balu, no balu mos seidauk hetan apoiu husi SEKOOP.

Arsénio Pereira da Silva esplika tinan ida ne’e no mós 2027  la eziste ba iha grupu kooperativa sira. Tanb ne’e, liga ho planu no politika IX Governu Konstitusionál nian, katak maske iha lei organiku SEKOOP ne’e eziste. Maibe, politíka governu nia desidi katak atu kapitaliza fundus ne’e ba iha banku dezenvolvimentu nasionál hodi nune’e bele aplika fali faze emprestimu iha banku ba  grupu sira  halo atividade ekonomiku ho responsabilidade

Grupu kooperativa sira ne’ebé maka durante ne’e hetan apoiu husi SEKOOP ohin loron sira bele dezenvolve ona sira nia grupu ba oin. Tanba, agora grupu kooperativa sira iha teritóriu nasionál ne’ebé maka hetan apoiu husi SEKOOP atinji ona  sira-nia kapital  liu ona millaun 21 USD.

Sekretariu Estadu Kooperativa mós relata kona-ba númeru ne’ebé aas liu mós iha ramu Uniaun  ba Kreditu,  primieru Rejiaun Administrativa Oé-Cusse Ambeno ne’ebé iha grupu balun sira nia orsamentu kapital  atinji ona millaun  3000  USD  no Baucau grupu kooperativa balun ne’ebé uluk hahú ho 1000 USD  to’o agora sa’e ba 59,000 USD.

Jornalista: Remigia Locatelli