SEKOMS Anúnsiu Ba Públiku Bele Asesu Kopa Mundial 2026 Iha TV Prepagu ETO -TELCO No RTTL, E.P

Konferénsia imprensa SEKOMS, FFTL, ETO-TELCO ho RTTL,E.P kona-bá transmisaun kopa mundiál 2026, Sesta 5 Juñu 2026.

Díli, 05 Juñu 2026 (RAFA.TL)- Sekretáriu Estadu Komunikasaun Sosiál (SEKOMS), Expedito Dias Ximenes, hamutuk ho Prezidente Federasaun Futeból Timor-Leste (FFTL), Nilton Telmo dos Santos Gusmão, no akompaña husi jerente ETO-TELCO Edmundo Freitas Lopes ho reprezentante RTTL,E.P, Sesta (5/06/2026), iha Otél Timor, ofisialmente anúnsiu ba públiku hadomi futeból iha Timor-Leste atu bele asesu Kopa Mundiál 2026 iha TV Prepagu ETO –TELCO, (NTV), RTL, E.P no bele mós asesu live streaming iha Timor Telecom.

Notísia Relevante: ETO-TELCO Fó Sub-Lisensa Ba RTTL, E.P Transmite Kopa Mundiál 2026

Ba transmisaun Kopa Mundiál 2026 ne’ebé sei joga hahú husi  loron 11 fulan-Juñu to’o loron 19 fulan-Jullu, tinan ne´e, iha Timor-Leste Empreza ETO-TELCO mak hetan lisensa ofisiál no fó mós sub-lisensa ba RTTL, E.P no Timor Telecom.

SEKOM Expedito Dias Ximenes hatete, iha ona servisu hamutuk entre  ETO-TELCO no RTTL, E.P tuir konkordánsia ne’ebé antes halo ona akordu katak ETO -TELCO maka sei sai responsavél ba broadcasting durante kopa Mundiál 2026.

“Ita hotu hatene ETO-TELCO maka sai host broadcasting ba iha kopa mundial ka taxa mundial iha Timor-Leste tanba eventu ida ne’e  desporto ida naran futeból  ne’e bele dehan katak atividade ida ne’e  ka desporto komunitariu povu hot-hotu, komunidade tomak sente katak desporto ida ne’e, futebol ne’e, liu-liu joven sira ne’ebé hadomi futeból, iha fulan ida nia laran, sei asiste transmisaun kopa mundiál liu-husi, ETO-TELCO  nia kanal (NTV), liu husi RTTL, ho Timor Telecom (TT) ,” hatete Expedito Dias Ximenes.

Iha Fatin hanesan Prezidente FFTL Nilton Telmo Gusmão Dos Santos, apresia Governu liu -husi Sekretária Estadu Komunikasaun Sosiál ne’ebé fó ona  kontribribuisaun ba  atividade kopa mundiál tinan ne’e.

” Lori FFTL nia naran, hanesan mós prezidente hakarak agradese mós ba sekretária estadu komunikasaun sosial, liu -husi Nonu Governu ba laran luak, hodi bele apóia atividades, ne´ebé ita hanoin no ita konsidera nu’udár eventu espetakular ida atu fó kopa mundiál ida iha ita nia rai Timor-Leste,” Nilton  Gusmão hateten.

Enkuantu kona-bá trasmisaun direita Kopa mundiál, tinan ne’e ETO -TELCO halo ona parséria ho RTTL. E.P hodi fahe sub-transmisaun no halo mós akordu kooperasaun ba live Streeming ho Timor-Telecom.

Jornalista; David Gonçalves/Editór: Vito Salvadór