Segunda Divizaun Liga Timorense, Fiel F.C Lidera Grupu A Hafoin Manan AS Ponta Leste ho Score 3-2

Fiel F.C susesu rekolla pontu másimu hafoin manan nia adversáriu AS Ponta Leste ho score 3-2 iha jogu kontinuasaun Liga Timorense époka 2026 group A iha Estádiu Munisipál Díli, Sábadu 30 Maiu 2026. Imajen/LFTL

Díli, 30 Maiu 2026 (RAFA.TL)- Fiel F.C susesu rekolla pontu másimu hafoin manan nia adversáriu AS Ponta Leste ho score 3-2 iha jogu kontinuasaun Liga Timorense époka 2026 group A.

Vitória ne’e provizoriamente hatuur metin ekipa Fiel F.C iha pozisaun dahuluk no hadook distánsia ho adversariu sira ho pontu neen.

Jogu ne’ebé hala’o iha Estádiu Munisipál Díli, Sábadu (30/05/2026), Fiel F.C no As Ponta Leste hatudu jogu ida furak iha kampu hodi lansa kontra atake ba malu. Maibé tama ba iha minutu 13 Jogadór Fiel F.C, João Ximenes marka uluk golu ida hodi lori nia ekipa lidera provizoriu ho score 1-0.

Liu de’it minutu lima ekipa AS Ponta Leste konsege halo empata liu hosi bola kabesada hosi  jogador Ario Ximenes hafoin aproveita bola kantu hodi muda score ba 1-1. Ho score refere halo ekipa rua kontinu lansa kontra atake to’o jogu priemeira parte termina.

Tama ba segunda parte jogu kontinua manas liután ba ekipa rua ne’e hodi lansa kontra atake ba malu. Ekipa Fiel F.C ne’ebé domina liu bola konsege produs tan golu ida hodi muda score ba 2-1, iha minutu 57 liu hosi jogadór Lourenço Ximenes.

Ho golu ne’e obriga treinadór ekipa AS Ponta Leste halo mudansa ba tátika liu hosi substituisaun ba jogadór hodi hasai Alberto Soares no Pedro da Costa  no  hatama Julvito Nascimento ho Dilvio do Santos.

Mudansa ne’e konsege hasae liután ritmu joga no konsege fó rezulatadu pozitivu iha minutu 80 Ponta Leste  responde hikas golu ida hodi halo empata ho score 2-2 liu hosi jogadór suplente Julvito Nascimento, avansadu ho númeru kamizola 9 hafoin simu asistensia bola kruza hosi nia kompatriota Ario Ximenes.

Ksolok As Ponta Leste la dura to’o tempu naruk tanba liu de’it minutu ida ekipa Fiel F.C konsege produs tan golu ida liu hosi jogadór Lourenço Ximenes hodi kontribui aumenta score sai 3-2. Avansadu ho númeru kamizola 7 ne’e marka golu hafoin simu asistensia bola kruza hosi nia kompatriota Expedito Fuel iha liña iskerda.

Ho rezulatadu ne’e, Fiel F.C provizoriamente metin iha pozisaun dahuluk klasifikasaun grupu A no habelar distánsia ho nia adversariu ho pontu neen hosi jogu rua ne’ebé manan hotu. Enkuantu ekipa AS Ponta Leste tun ba pozisaun da-toluk hafoin sofre derrota no empata ida hosi jogu rua ne’ebe hala’o ona.

Jornalista: Davilio Valdameir/Editór: Vito Salvadór