Segredu Justisa, PTR La Fó Komentáriu Ba Kontestasaun Juíz Na’in-Haat Kona-bá Transferénsia

Prezidente Tribunál Rekursu, Afonso Carmona.

Díli, 23 Setembru 2026, (RAFA)– Prezidente Tribunál Rekursu (PTR),  Afonso Carmona,  la fó komentáriu kle’an ba kontestasaun husi juíz na’in-haat kona-bá transferénsiabá  ne’ebé  ordena husi Konsellu Superior Majistratura Judisiál (KSMJ).

PTR Afonso Carmona e bá jornalista  hafoin audénsia ho Komisaun A iha Parlamentu Nasionál Kuarta-ne’e, hateten desizaun ne’e koletivu husi Konsellu Superior Majistratura Judisiál  nian.

“Ida-ne’e, ha’u labele ko’alia tanba segredu  justisa,  kuandu sira bele  halo reklamasaun, tanba  karta sira ne’ebé maka tama ema sempre haré, tanba   ha’u hanoin ida ne’e maka ha’u bele ko’alia, ha’u labele halo komentáriu tanba saida, tanba buat hotu-hotu la’o ne’e interese Estadu nian, la’ós interese ema ida rua nian,” Afonso Carmona hateten.

Prezidente Tribunál Rekursu ne´e hatutan, atu muda  juíz sai ka promove Juíz ne’e Estadu nia regra la’ós PTR   nia regra.

Fó hanoin fali Majistradu na’in-haat husi Tribunál Judisiál Primeira Instánsia Díli,  submete  karta reklamasaun ba Konsellu Superior Majistratura Judisiál (KSMJ) kona-bá desizaun ne’ebé determina sira nia transferénsia ba Tribunál sira seluk hanesan Baucau, Suai no Oé-cuse.

Reklamasaun ne’e, ne’ebé aprezenta liuhusi JU,S Jurídiku  Sosiál Konsultoria, dirije ba  reuniaun plenáriu Konsellu Superior Majistratura Judisiál  no buka kontesta desizaun ne’ebé aprova iha 15.ª sesaun estraordinária, iha loron 21 fulan-Agostu, no publika ona iha Jornal da República iha loron 16 Setembru-ne’e.

Desizaun ne’e transfere majistradu judisiál na’in-sia entre tribuál sira iha Díli, Baucau, Suai no Oé-Cusse.

Jornalista: Marcelino  Tomae