Sarani Hotu Bele Presta Omenajen Ba Preladus Katólika Na’in-Haat iha Tasi Tolu

Sarani tomak bele ba presta omenajen ikus ba preladus katólika Timoroan na’in-haat iha Tasi Tolu.

Díli, 07 Setembru 2026 (RAFA) –  Vise-Koordenadór Komisaun Organizadora, Padre Guilermino da Silva informa, komisaun fó oportunidade ba sarani tomak hodi bele ba presta sira nia omenajen ikus ba preladus katólika Timoroan na’in-haat, Dom Jaime Garcia Goulart, Dom José Joaquim Ribeiro, Monseñor Martinho da Costa Lopes ho Dom Alberto Ricardo iha Altar Tasi-Tolu.

“Hakarak hatudu sira nia domin hakarak hatudu sira nian fiar ba iha sira nia preladus ne’e komisaun fó oportunidade ba sarani tomak atu bele fó omenajén ba iha preladus sira ne’ebé oras ne’e daudaun sira iha kapelina Tasi-Tolu nian,”  Saserdote ne’e informa, Segunda-ne’e ba jornalista sira.

Amu Guilermino da Silva adianta, presta omenajén ne’e halo kedan desde loron 01 fulan-Setembru-ne’e bainhira preladus katólika Dom Jaime Garcia Goulart, Dom José Joaquim Ribeiro, Monseñor Martinho Da Costa Lopes ho Dom Alberto Ricardo hatoba iha kapeliaun Tasi tolu.  Sarani sira to’o iha orgaun soberania no instituisaun estadu sira presta omenajén antes   to’o iha  loron 10 fulan-Setembru-ne’e.

Nia afirma to’o iha loron 10 Setembru laiha ona omenajén no sarani sira bele prepara aan hodi tuir misa ba urnas preladus Katóliku na’in haat Dom Jaime Garcia Goulart, Dom José Joaquim Ribeiro, Monseñor Martinho da Costa Lopes ho Dom Alberto Ricardo, ne’ebé sei realiza iha  tuku 05:00 Otl, loraik iha Tasi-Tolu Díli.

Jornalista : Zita Menezes