Rotasaun Juíz Na’in-Haat iha TJPID La Implika Ba Prosesu Kazu Koletivu Sira

Prezidente Tribunál Rekursu, Afonso Carmona fó pose ba Yudi Pamukas, foin lalais ne'e. Imajen/tribunais.tl

Díli, 17 Setembru 2026 (RAFA)- Juíz Administradór Tribunál Judisiál Primeira Instánsia Díli (TJPID) Yudi Pamukas,  hateten rotasaun ba juiz na’in-haat la implika bá prosesu kazu koletivu sira ne’ebé hala’o ona antes tanba seidauk to’o desizaun finál.

Juíz Administradór TJPID, Yudi Pamukas hatete bá  Jornalista sira iha  Díli, Kinta-ne’e,  katak rotasaun Juíz sira entre Tribunál Judisiál Primeira Instánsia iha Timor-Leste bazeia ba deliberaasaun Konsellu Superiór Majistratura (KSM).

Nia esplika katak, Juíz na’in-haat husi TJPID transfere ba Tribunál Judisiál Primeira Instánsia sira seluk, hanesan Suai, Baucau no Oé-Cusse, maibé nune’e mós Juíz na’in-haat seluk mai substitui sira nia fatin bazeia ba deliberaasaun Konsellu Superiór Majistratura.

“Bazeia bá desizaun Konsellu Superior Majistratura, Juíz sira husi Tribunál  Judisiál Primeira Instánsia Díli na’in -haat transfere ba tribunál sira seluk hanesan Suai, Baucau no Oé-Cusse. Husi Juíz na’in-haat ne’e sai, iha tan na’in-haat substitui fali sira,”  Juíz Administradór Yudi Pamukas konfirma.

Nia hatutan, rotasaun ne’e mós akontese entre tribunál sira, ho Juíz balu husi Baucau, Suai no Oé-Cusse mai servisu iha Díli, no Juíz husi Díli transfere ba tribunál sira seluk.

Kona-bá  implikasaun  iha prosesu sira tanba mudansa Juíz,  tuir nia haré katak, rotasaun ne’e kuaze laiha implikasaun bá  prosesu sira ne’ebé julgamentu hahú ona.

Nia hatutan katak, ba prosesu krime ne’ebé julgamentu hahú ona, Juíz ne’ebé antes trata kazu ne’e tenke kontinua to’o remata, inklui to’o iha desizaun final, sentensa ka akordaun, maske Juíz refere, transfere ba tribunál seluk Suai, Baucau ka Oé-Cusse no bá kazu ne’ebé hahú ona julgamentu, Juíz ne’ebé sai husi ne’e tenke remata tiha, finaliza tiha to’o desizaun final, sentensa no akordaun.

Enkuantu ba prosesu sivíl, nia esplika, Juíz ne’ebé trata kazu tenke, pelumenus, halo despaisu kona-ba matéria importante antes husik prosesu ne’e, hodi Juíz foun bele kontinua prosesu to’o iha desizaun final, sentensa ka akordaun.

Ba kazu krime ne’ebé julgamentu kontinua, maske Juíz transfere ona bá Suai, Oé-Cusse ka Baucau, Juíz refere sei presiza  jere nia ajenda hodi mai fila fali ba TJPID atu kontinua prosesu sira ne’ebé nia hahú ona to’o desizaun finál.

Juiz administradór ne´e  informa  TJPID atualmente iha Juíz hamutuk na’in-15 no estajiáriu na’in-neen

Tuir lista rotasaun Juíz  ne’ebé RAFA asesa maka hanesan; António José Fonseca Monteiro de Jesus, ne’ebé koloka iha Tribunal Judisiál Primeira Instánsia Díli, mak juís ho antiguidade liu entre juís direitu na’in-neen hosi 2.ª klase iha Timor-Leste. Nia transfere ba Suai, Ana Paula Fonseca Monteiro de Jesus, mós hosi Díli, mak juíza ho antiguidade liu entre juís direitu sira hosi 3.ª klase. Nia simu pose iha 2007 no transfere ba Oé-Cusse, ne’ebé mak tribunál primeira instánsia iha área periférika liu entre tribunál haat. Juís na’in-hitu seluk ne’ebé transfere mak José Gonçalves no Francisca Marques Cabral, rua hosi Díli, ne’ebé haruka respetivamente ba Suai no Baucau; Florência Freitas, Naasson Mário Armindo Marques Doutel Sarmento no Samuel da Costa Pacheco – ida ikus ne’e la inklui iha lista final – entre Suai no Díli; Maria Modesta de Almeida Vieira no Sribuana da Costa, hosi Baucau ba Díli; no Benjamin Barros.

Jornalista: Marcelino Tomae