Reuniaun Alargada FRETILIN Produz Rezolusaun Ualu Ne’ebé Determina Futuru Lideransa CCF

Sekretáriu Jerál FRETILIN Mari Alkatiri lidera reuniaun alargada CCF iha Sede CCF, Díli, Sábadu 31 Agostu 2026. Imajen/Espesiál

Díli, 30  Agostu 2026 (RAFA)- Partidu Frente Revolusionária Timor-Leste Independente (FRETILIN), liu husi reuniaun alargada iha Sede Comité Central FRETILIN (CCF),  Sábadu-ne’e, produz rezolusaun ualu ne’ebé sei determina futuru lideransa CCF liu husi VI Kongres Nasionál no Eleisaun Jerál da-hitu.

Reuniaun alargaga CCF ne’ebé lidera husi Sekretáriu Jerál FRETILIN Mari Alkatiri, hodi halo análize kle’an ba situasaun polítika ne’ebé daudaun ne’e Timor-Leste hakat liu hela.

Sita husi komunikadu ofisiál CCF nian ne’ebé RAFA asesa, Domingu ne’e, haktuir reuniaun ida ne’e mós halo diskusaun hodi haré ho krítiku saida mak FRETILIN bele halo no tenki halo iha situasaun ida ne’e.

Ko’alia iha abertura reuniaun CCF ne’e, Sekretariu Jerál no Prezidente Interinu FRETILIN nian,  Mari Alkatiri esplika, reuniaun CCF ida ne’e hala’o iha momentu ida ne’ebé krítiku tebes iha Nasaun no partidu nia vida.

“FRETILIN hakat iha dalan no tempu ida ne’ebé naruk tebes ona no liuhosi mudansa oin-oin iha tempu oin-oin iha faze diferente vida Timor-Leste nian en termus estrutura no polítika sira,” hatete SekretáriuJerál FRETILIN Mari Alkatiri.

Ho mudansa iha realidade ohin loron, CCF presiza atu diskitu no haré oinsá mak FRETILIN bele moderniza an hodi responde ba mudansa dezafiu hosi ne’e ba oin atu bele kumpriende di’ak liu povu no nasaun nia problema sira no fó resposta ne’ebé adekuadu.

Durante reuniaun membru sira CCF nian halo diskusaun kle’an no nota ho preokupasaun boot katak Timor-Leste monu ona iha pegada krimi organizadu internasionál no tamba ne’e presiza atu harii konsiensia komum ida kona-ba importansia no urjensia atu salva Timor-Leste hosi situasaun ida ne’e molok sindikatu krimi organizadu sira halo State Capture ka domina Estadu Timor-Leste nia orgaun soberania sira.

Reuniaun ne’e CC mós aprova rezolusaun ualu ne’ebé sei tulun FRETILIN hala’o diak liu no foku ba prioridade sira prosesu modernizasaun partidu nian. Rezolusaun sira ne’e mak.

1. Rezolusaun Nú. 01/CCF-5°/VIII/2026 hodi fó omenajen póstumu ba Saudozu Kamarada Prezidente Francisco Guterres “Lú-Olo.”
2. Rezolusaun Nú. 02/CCF-5°/VIII/2026 ne’ebé marka data ba FRETILIN nia Kongresu Nasionál ba da-neen (6).
3. Rezolusaun Nú. 03/CCF-5°/VIII/2026 ne’ebé deklara FRETILIN sei fó prioridade ba Partidu no Povu Timor-Leste no ba ida ne’e sei la aprezenta kandidatura rasik ba eleisaun Prezidensiál tinan-2027.
4. Rezolusaun Nú. 04/CCF-5°/VIII/2026 ne’ebé harii Komisaun Nasionál Preparasaun no Organizasaun ba VI Kongres Nasionál FRETILIN nian no Eleisaun Jerál Dahitu.
5. Rezolusaun Nú. 05/CCF-5°/VIII/2026 ne’ebé lansa kampaña “Militante Nu’udar Baze Apoiu Luta nian” no hahú kontribuisaun solidariu no ho konsiensia hodi militante sira tuir sira nia kbiit atu reforsa FRETILIN.
6. Rezolusaun Nú. 06/CCF-5°/VIII/2026 ne’ebé aprova Regulamentu Disiplinár FRETILIN nian.
7. Rezolusaun Nú. 07/CCF-5°/VIII/2026 kona-bá paridade demokrátika no kuota reprezentasaun feto nian, ne’ebé deside hodi hasa’e reprezentasaun feto nian ba 40% iha kargu eletivu hotu-hotu iha FRETILIN nia laran.
8. Rezolusaun Nú. 08/CCF-5°/VIII/2026 kona-bá Transladasaun Restus Mortais Bispu sira nian mai Timor-Leste hodi saúda inisiativa transladasaun ba saudozu Amu Bispu sira; Dom Jaime Garcia Goulart, Dom José Joaquim Ribeiro, Monsiñor Martinho da Costa Lopes no Dom Alberto Ricardo da Silva.

Jornalista: Cristina Ximenes/Marcelino Tomae