Restus Mortais Lú-Olo Sei To’o Díli iha Madrugada Tersa-feira ho Aero Dili

Díli, 22 Júnu 2026 (RAFA.TL) – Sekretáriu-Jerál partidu FRETILIN, Mari Alkatiri konfirma restus mortais husi eis-Prezidente Repúblika Francisco Guterres “Lú-Olo” sei to’o Díli iha tuku 06:00 dadersan, iha tersa-feira, 23 Junu, liu husi voo fretadu espesial ne’ebé operadu husi Aero Dili.

Alkatiri hateten ba Rafa.tl katak aviaun ne’e la’ós transporta de’it kaisaun, maibé mós  faluk Cidália Lopes Nobre Mouzinho Guterres, oan husi saudozu, no familia sira seluk.

Mari Alkatiri mós sei akompana mate isin saudozu nian mai Timor-Leste, tanba antes ne’e nia iha Kuala Lumpur hodi akompaña Prezidente FRETILIN durante tratamentu intensivu iha Hospital Prince Court, to’o husik is iha Domingu, 21 Juñu ne’e.

Governu Timor-Leste deklara tiha ona lutu nasional, ne’ebé hahú husi tuku 15:00 ohin, Segunda-feira, no sei kontinua to’o tuku 00:00 loron 28 fulan-Juñu ne’e.

Detallu sira kona-bá programa funebre ofisiál seidauk publika husi autoridade sira ka família.  Maibé, tuir fonte balun ne’ebé Rafa.tl asesu, sei iha omenajen iha Palásiu Prezidénsia Repúblika, Parlamento Nasional, Kuartel Jenerál FALINTIL-Forças de Defesa de Timor-Leste (F-FDTL), sede Komité Sentral FRETILIN (CCF) iha Díli, no mós iha rezidénsia Lú-Olo iha Farol, Díli.

Prezidente Repúblika, José Ramos-Horta, hateten ba Rafa.tl katak mate isin sei simu husi Guarda de Honra F-FDTL iha aeroportu, no funerál sei hala’o iha Jardim dos Heróis, Metinaro.

Restus mortais sei lori diretamente husi Aeroportu Prezidente Nicolau Lobato ba família nia uma iha Farol, no detallu finál sei define depois ho faluk, família, responsavel partidu no autoridade Timor-Leste sira.

Fonte sira husi FRETILIN hateten katak funerál bele hala’o iha Sábadu.

Dekretu ne’ebé Governu aprova iha loron ida ne’e deklara “Lutu Nasional iha teritoriu nasional tomak, hanesan sinál de pesar ba falesimentu Dr. Francisco Guterres, ex-Prezidente Repúblika Democrátika Timor-Leste”.

“Durante períodu Lutu Nasional ne’e, Bandeira Nasional tenke iha meia haste” ne´ebe klarifika iha dekretu, no instrusaun ne’e tenke kumpri iha edifísiu públiku hotu-hotu, inklui embaixada, konsuladu no reprezentasaun estadu iha rai-li’ur.

Lú-Olo, moris iha loron 7 Setembru 1954 iha Ossú, Munisípiu Viqueque, dedika nia aan iha ai-laran durante tinan 24 iha rezisténsia armada durante okupasaun indonézia.

Nia mak komandante ida husi komandante haat nebe hela to´o hotu iha ai-laran durante período luta tomak, no lidera polítika rezisténsia Armada depoizde Xanana Gusmão hetan kapturasaun iha 1992 no Konis Santana mate iha 1998.

Nu’udar prezidente Assembleia Konstituinte, Lú-Olo mak proklama Restaurasaun Independénsia Repúblika Demokrátika Timor-Leste iha meia-noite 20 Maiu 2002, no mós fó pose ba Xanana Gusmão nu’udar Prezidente Repúblika primeiru.

Nia mós lidera Parlamento Nasional husi 2002 to’o 2007, no eleitu Prezidente Repúblika iha 2017, kargu ne’ebé nia hala’o to’o 2022.

Remata