Reprezentante Povu Lamenta ho Presu Simentu Atuál Ne’ebé Sa’e Ba US$5.00 To’o US$6.00 Kada Suku

Xefe Bankada CNRT, Patrocino Fernandes dos Reis.

Díli, 16 Setembru 2026 (RAFA) – Reprezentante povu iha Parlamentu Nasionál lamenta ho folin simentu atuál ne’ebé sa’e ba US$5.00 to’o US$6.00 kada suku tanba  sei afeta direita ba dezenvolvimentu nasionál.

Xefe Bankada CNRT, Deputadu Patrocino Fernandes dos Reis ba jornalista sira, Kuarta-ne’e, iha Parlamentu Nasionál hatete, lamenta ho folin simentu atuál nune’e nia parte husu Governu halo peskiza ba situasaun ida-ne’e hodi bele fó solusaun ba folin simentu.

Deputadu ne´e afirma ida-ne’e hatudu no fó sinal ida katak, talvez iha mudansa globál kona-bá iha ligasaun ho folin mina ho buat sira ne’e hotu,  bele lori implikasaun ba iha simentu  mós entaun ita sei haré,

“Ita husu atu Governu halo peskiza ida hodi haré impaktu husi situsaun ida-ne’e. kauza saida mak folin sira ne’e sa’e nia impaktu saida mak iha no Governu sei halo desizaun hodi halo analiza haré no solusaun saida mak depois Governu bele halo para depois bele fó solusaun ba problema sira ne’e,” hatete Deputadu Patracino Fernandes dos Reis

Patrocino afirma informasaun ida-nee importante tebes, tanba ne’e media sira mós presiza halo investigasaun kle’an ba informasaun sira ne’e hodi bele ajuda públiku no kauza ne’e mai husi ne’ebé nune’e bele sai hanesan informasaun ba iha Reprezentante Povu no Governu hodi bele fó solusaun ba presu sementi ne’ebé sa’e la tuir presu norma.

Fatin hanesan Xefe Bankada PLP, Deputada Maria Angelina Sarmento hatutan, nia parte la menta karik folin  simenti ne’e sa’e tanba kauza husi  presu kombustivél, tanba ne’e nia parte husu  Governu tenke altera dekretu lei hodi redús presu kombustivél ne’ebé Governu tau ona iha insentivu subsidiu kombustivél hodi nune’e labele fó implikasaun ba presu nesesidade sira seluk.

“Ida-ne’e ha’u foin mak rona miabé triste tebes tanba Governu sé razaun tanba dehan kombustivél sa’e mak impliká ba presu nesesidade primaria infraestrutura nia sa’e  ne’e ami la menta tebes,” tenik Deputada Angelina Sarmento.

Daudaun ne’e Timor-Leste enfrenta krize fornesimentu simentu iha merkadu nasionál, antes ne’e simentu folin normal husi US$4,50 maibé agora daudaun folin simentu sa’e ona ba folin US$5.00 to’o US$6.00 kada saku.

Jornalista : Zita Menezes