Rekrutamentu Kadetes PNTL Aumenta husi 400 Ba 750

Ministru Interiór (MI) Francisco da Costa Guterres.

Díli, 27 Maiu 2026 (RAFA.tl)- Ministru Interiór (MI), Francisco da Costa Guterres, informa rekrutamentu ba kadetas foun Polísia Nasionál Timor-Leste (PNTL) aumenta husi númeru anteriór na’in- 400 ba  na’in-750 tuir orsamentu no nesesidade ne’ebé instituisaun Estadu ne’e presiza.

“Ita iha orsamentu tanba aumentu númeru, la’ós ona na’in- 400 maibé ba ona  na’in-750 tanba ne’e mak ita iha orsamentu uituan tau para hodi bele halo rekrutamentu foun,” Ministru Interiór Francisco da  Costa Guterres informa ba Jornalista sira iha Edifisiu Ministériu Finansa, Díli, Kuarta (27/05/2026).

Governante ne’e hatutan, Governu aloká ona Orsamentu Jerál Estadu (OJE) 2026 hamutuk millaun ida USD  ba iha prosesu rekutamentu foun kadetas PNTL no iha rekrutamentu foun, orsamentu  antes ne’e laiha prosesu tanba la lakon buat barak ona, foun ne’e mak presiza tan tanba aumenta tán farda ba sira.

Nia esplika razaun aumenta númeru rekrutamentu ba kadetes PNTL foun husi 400 ba iha 750, tanba unidade polísia barak mak nia membru idade 50 ba leten.

“Tanba kestaun fronteira ita iha polísia iha ne’ebá mesak katuas hotu ona, agora ita prezisa foin-sa’e ba iha ne’ebá. Sira ne’ebe idade 50 labele halo patrullamentu loro-loron. Entaun ita presiza rekrutamentu foun hodi ba troka fali sira katuas, depois unidade marítima tasi nian  mós presiza tán membru foun,” Ministru Interiór hateten.

Ministru Francisco da Costa Guterres, informa kandidatu sira tenke idade ida 18, 19  to’o 20  fó treinu para sira mós bele  sa’e ró para halo patrullamentu iha tasi-laran halo buat sira no sira mós sei lori ró no mós unidade espesiál ne’e presiza tebe-tebes, tanba sira bele halo patrulamentu rutina loro-loron la’o iha  komunidade sira nian leet hodi prevene krime sira ne’ebé akontese.

Nia subliña kona-bá kandidatu sira ne’ebé antes ne’e liu ona iha faze rekrutamentu ne’e sei tuir hotu fali prosesu rekrutamentu foun, tanba  prosesu antes ne’e Konsellu Ministru anula tiha ona nia rezultadu.

Garante Transparánsia Iha Prosesu Rekrutamentu

Ministru Interiór (MI) Francisco da Costa Guterres, hateten Governu sei envolve entidade oin-oin iha prosesu rekrutamentu foun ba kadetas Polisia Nasionál Timor-Leste (PNTL) hodi garante transparánsia.

Daudaun ne’e prosesu rekrutamentu foun la’o tiha ona, juri sira konstitui ona, agora tama ona iha prosesu atu halo revizaun, orsida juri mak sei halo prosesu revizaun dokumentál ba iha prosesu tomak.

“Juri mak sei halo no komandu jeral, depois mak ita haree took espera katak iha kompleta  fulan rua tolu nia laran, ita bele iha ona ajente foun sira, agora prosesu data loos hotu ona ne’ebé prosesu legal ne’e ita tenke rezolve lai, baze legal, ami kompleta ona hein de’it ona prosesu sira ne’ebé mak sei la’o tuir mai,” Francisco da Costa Guterres hateten.

Governante ne’e afirma, durante iha  fulan-Maiu  tenke kompleta lai baze legal sé baze legal laiha prosesu rekrutamentu ne’e labele la’o, baze legal iha ona konstitui ona ekipa, depois despaxu Ministeriál kona-bá regulamentasaun  ba prosesu ne’e iha hotu ona komisaun rekrutamentu la’o tuir de’it ona no fasil ona importante liu mak Governu prepara baze legal para fó fatin ba juri sama iha leten para prosesu rekrutamentu bele la’o ho di’ak.

Nia afirma juri ba rekrutamentu foun ne’e kompostu husi Polisia na’in rua ida mak ofisiál dirijente, ne’ebé sei nomeia sai hanesan , Prezidente juri , depois juri sei mai husi mós Australia na’in rua, husi Portugal na’in rua no sei hahú halo rekrutamentu.

Nia adianta sistema eletronika ba test sei  hatene kedan rezultadu kuandu lakon, lakon ona,  garante no fiar katak sistema ne’e sei iha etapa revizaun, tanba sekretariudu mós sei iha komisaun monitorizasaun fiskalizasaun ne’ebé kompostu husi entidade oin-oin atu haré.

“Ita mós husu ba PDHJ no selu-seluk akompañia besik prosesu rekutamentu ida-ne’e komisaun rekrutamentu iha Komandu Jerál PNTL nian okos, maibé sei hetan supervizaun rigór husi instituisaun oin-oin prezidénsia mós sei haree tau matan komunidade mós tau matan, ita-boot sira (jornalista) mós sei ba para tau matan, ba haree prosesu tomak para depois ita hakarak prosesu ne’e transparansia,” Francisco da Costa Guterres tenik.

MI esplika Parlamentu nasional sira sei halo supervizaun no fiskalizasaun ketak bai ha prosesu rekrutamentu foun PNTL,  para nune’e  iha instituisaun barak para tau lesuk matan hodi garante prosesu ne’e la’o di’ak.

Jornalista : Zita Menezes/Editór: Vito Salvadór