Reinaldo Júnior, Oan Mane Komandante Kilik Wae-Gae Hateten Importánsia Loron FALINTIL Buka Halo Reflesaun

Reinaldo Júnior, Oan Mane Komandante FALINTIL Saudozu Kilik Wae-Gae.

Díli, 18 Agostu 2026 (RAFA)– Reinaldo Júnior, oan mane husi Komandante  FALINTIL  Saudozu Kilik Wae-Gae, konsidera selebrasaun  loron FALINTIL  ba dala-51 iha loron 20 fulan-Agostu 2026, tenke sai momentu  reflesaun kona-bá istória no sakrifísiu ba luta libertasaun Timor-Leste.

“Ita komemora loron FALINTIL hanesan loron importante sira seluk atu halo reflesaun, buka hatene ita nia pasadu no apresia kontribuisaun, sakrifísiu no determinasaun. Loron FALINTIL ne’e nu’udar loron istóriku ne’ebé hola parte iha libertasaun nasionál,”  Reinaldo Júnior haktuir ba RAFA iha Sede Jerasaun Patriota iha Díli, Tersa-ne’e.

Reinaldo mós subliña katak reflesaun kona-bá FALINTIL la’ós de’it kona-bá tratamentu ba família veteranu sira, maibé mós kona-bá  objetivu luta ne’ebé sira hakarak atinji duni ona ka seidauk.

“FALINTIL uluk la’ós de’it forsa armada FRETILIN nian. Depois, iha 1975, partidu no forsa armada separa tuir orientasaun polítika, maibé objetivu boot ida de’it. Entaun, ita tenke halo reflesaun la’ós de’it kona-bá oinsá trata família FALINTIL, maibé mós kona-bá objetivu luta ne’e ita alkansa ona ka lae,” nia afirma.

Fó Atensaun ba Kondisaun Sosio-ekonómika FALINTIL

Reinaldo Júnior apela ba ukun na’in sira atu kontinua halo reflesaun kona-bá objetivu luta, liuliu kona-bá melloria moris povu nian. Ukun-na’in sira tenke halo reflesaun atu luta hadi’a povu nia moris, tanba ohin loron povu barak, liuliu foin-sa’e sira, nafatin moris iha susar no laiha kampu de traballu ba sira.

Nia hateten, objetivu ikus husi luta mak atu asegura povu hotu-hotu bele moris ho kondisaun sosio-ekonómia ne’ebé sufisiente.

“Aban0bainrua bainhira ita atinji no alkansa ona objetivu luta, ita tenke haré kondisaun sosio-ekonómia ema hotu nian. La’ós ita komemora loron ne’e de’it atu haré oinsá halo tratamentu ba família, maibé objetivu loloos mak povu hotu moris ho kondisaun sosio-ekonómia ne’ebé sufisiente,”  Reinaldo Júnior afirma.

Investimentu ba Komponente Naval

Reinaldo Júnior mós sujere Governu atu aumenta investimentu ba F-FDTL, liuliu Komponente Naval, atu proteje no asegura rekursu marítimu Timor-Leste husi atividade illegal sira.

“Ha’u haré ita nia territóriu Timor-Leste ne’e boot liu iha área marítima, ho porsentu 70, no rai maran porsentu 30. Tanba ne’e, tenke halo investimentu ba Forsa Armada atu koloka forsa barak liu iha Komponente Naval. Labele koloka barak liu de’it iha Komponente Terrestre,” nia fó hanoin.

Nia mós husu atu komemorasaun loron importante, hanesan loron FALINTIL no Loron Restaurasaun Independénsia, bele realiza iha munisípiu hotu-hotu, hodi promove no preserva sítiu no patrimóniu istóriku sira.

Nia subliña katak komemorasaun importante tenke fó rezultadu konkretu, liuliu iha preservasaun memória istórika no edukasaun ba jerasaun foun kona-ba luta no sakrifísiu ba independénsia Timor-Leste.

Jornalista: João Carlos/Juvinal Cabral