Reativa Operasaun iha Tempu Kalan, Polísia Halo Apreensaun Ba Motór 70

Komandante PNTL Munisípiu Díli, Komisáriu Asistente, Orlando Gomes.

Díli, 10 Juñu 2026 (RAFA.TL)-  Komandante Polísia Nasinál Timor-Leste (PNTL) Munisípiu Díli, Komisáriu Asistente, Orlando Gomes, Kuarta (10/6/2026), informa Polísia  hahú reativa operasaun la’o ain iha tempu kalan hodi kombate kazu krime sira iha kapitál Díli.

“Ikus-ikus ne’e grafika numéru kazu naok komesa sa’e ona. Durante ne’e, Polísia halo prevensaun lakon tiha, agora komesa mosu tanba ne’e  Polísia  hahú Segunda-ne’e, kalan-kalan halo operasuan la’o ain no halo pasarevista ba transporte sira iha tempu kalan,” Komisáriu Asistente Polísia, Orlando Gomes.

Komandante Polísia Munisípiu Díli ne’e hateten operasaun iha  kalan-rua, Segunda-Tersa ne’e, kosege prende motorizada sira hamutuk 70-resin, tanba motór balun la uza asesoris, laiha dokumentu no mós motorista laiha karta kondusaun, inklui motorista balun menoriedade.

“Motorizada hirak ne’e asegura iha Komandu Polísia Díli, hein nain sira ba selu multa iha Banku hafoin intrega fila motorizada,” Orlando Gomes informa.

PNTL mós sei  halo koordenasaun ho FALINTIL-Forsa Defeza Timor-Leste (F-FDTL) no  ekipa sekreta sira atu indentifika tuir grupu naok sira ne’ebé halo movimentu iha kapitál Díli.

Komandante  Polísia Díli  apela ba  inan-aman sira atu kontrola oan sira no  bainhira husik oan sira ransu livre hodi involve grupu  ba naok no hadau ema nia sasán sei enfrenta ho autoridade Polísia no órgaun judisiáriu.

Jornalista : João Carlos/Editór: Vito Salvadór