Ramos-Horta “Laiha Vontade” Rekandidata iha Eleisaun Prezidensiál 2027-2032

Prezidente Repúblika José Ramos-Horta

Díli, 05  Agostu  2026 (RAFA.TL)- Prezidente Repúblika (PR), José Ramos-Horta, hatete nia parte seidauk deside no “laiha vontade” atu kandidata an ba Prezidente Repúblika ba períodu 2027-2032.

“Ha’u seidauk deside. Há’u vontade laiha liu atu kandidata an ba Prezidente Repúblika.  Sé  ha’u la kanditu an. Ha’u hatete de’it maka ida-ne’e, se-se maka ba Prezidente Repúblika  foun iha tinan 2027, tenke kuidadu didi’ak, no tenke haraik an, servisu  didi’ak ho Governu ho Primeiru-Ministru Kay Rala Xanana Gusmão, tanba nia sei Primeiru-Ministru nafatin 2027-2028, eleisaun foun mai  2028 ita la hatene sé maka manan,” Xefe Estadu José Ramos-Horta ba jornalista sira iha Palásiu Prezidensiál, Kuarta-ne´e.

Xefe Estadu afirma, tantu sé mak mehi hakarak sai Prezidente Repúblika iha períodu tuir mai serbí nasaun nu’udár Prezidente Repúblika tenke hanoin halo esforsu hotu-hotu halo parseria di’ak ho Governu tanba Timor-Leste adopta sistema semi Prezidénsial.

Prezidente Repúblika José Ramos-Horta hahú nia mandatu hanesan Prezidente Repúblika iha 20 Maiu 2022 hafoin antes ne’e nia assume ona pasta nu’udar Xefe Estadu ba períodu ida 2007-2012.

Jornalista : Zita Menezes