Ramos-Horta Kontinua Apoiu Emerjénsia Direta Ba Família Kbiit-Laek

PR Ramos-Horta ho doutor Braganza entrega karreta ambulánsia rua ba Klinika Bairru-Pité, Kuarta 02 Setembru 2026.

Díli, 02 Setembru 2026 (RAFA)- Prezidente Repúblika, José Ramos-Horta kontinua fó apoiu emerjénsia direta ba família sira ne’ebé moris iha kondisaun susar liu ka kbiit-laek, no bainhira simu informasaun kona-bá família ne’ebé vulneravel haruka kedas funsionáriu Palásiu Prezidensiál ba haré no fó apoiu diretamente.

“Ha’u simu naran, simu vídeu ruma, ha’u haruka kedas ha’u nia staff. Hanesan foin daudauk, ha’u haruka kedas, ne’e laiha hein ka saida. Ha’u simu informasaun ohin kalan, ohin kalan kedas ha’u nia lojistika sira simu kedas informasaun husi ha’u. Loron ida de’it liu sira aranka ona ba lori kedas sasan, depois ita haré saida tan mak ita halo, halo uma ida, ka halo kios ida ba sira konforme,” Prezidente Repúblika, José Ramos-Horta hateten ba jornalista sira Palásiu Prezidensiál, Kuarta-ne’e.

Xefe Estadu esplika, governu halo nia servisu maka’ás loos liuhosi Minsiteriu Solidaridade Sosiál no Inkluzaun (MSSI), Prezidente halo ne’e hanesan kompleta.

Prezidente Repúblika mós haktuir katak, Vise-Primeiru-Ministru Mariano Assanami Sabino  mós halo uma ba kiak sira, purtantu atividade ne’e barak, la’ós de’it Prezidente nian.

“Prezidensia Repúblika halo hanesan lalais liu la tuir birokrásia oi-oin. Bainhira hahú uma ida, fulan ida, rua, tolu uma ne’e tenke prontu,” Xefe Estadu subliña.

Desde mandatu daruak hanesan Xefe Estadu,  José Ramos-Horta sempre tau prióridade ba família sira ne’ebé vulnerável, oan kiak sira, nutrisaun ba labarik no inan isin-rua sira, inklui fó mós apoiu konstrusaun uma ne’ebé dignu ba komunidade afetadu no kbiit lae sira iha teritóriu nasionál.

Jornalista: Cristina Ximenes