Noticias

Ramos-Horta Kondekora Kolár Ordem Timor-Leste Ba Juiz Mohamed Abdelsalam

todayNovember 16, 2026 41

Background
share close

Abu Dhabi, 16 Novembru 2026 (RAFA)-Prezidente Repúblika, José-Ramos Horta, kondekora Sekretáriu-Jerál Prémiu Zayed ba Fraternidade Umana Juíz Mohamed Abdelsalam ho Kolár Ordem Timor-Leste nu’udar rekoñesimentu ba ninia kontribuisaun sira ne’ebé dedikadu ba umanidade.

Jornalista RAFA, Cristina Ximenes ne’ebé akompaña Prezidente Repúblika, José Ramos-Horta iha Abu Dabhi haktuir, Orden Timor-Leste nian mak nasaun nia onra aas liu, ne’ebé fó ba individu sira ne’ebé hala’o ona servisu esepsionál no meritu ba nasaun no ba umanidade.

Juis Mohamed Abdelsalam maka juis no peritu legál nian ne’ebé maka serbisu nu’udar Sekretáriu-Jerál ba Prémiu Zayed ba Fraternidade Umana dezde tinan 2019 no ajuda hakerek Dokumentu istóriku kona-bá Fraternidade Umana ne’ebé asina husi Papa Francisco no Grande Imam Al-Azhar iha Abu Dhabi iha loron 4 fulan-Fevereiru 2019.

Juíz Mohamed Abdelsalam mós lidera Komité Superiór Fraternidade Umana nian, ne’ebé lansa Loron Internasionál Fraternidade Umana ne’ebé rekoñese husi ONU, no serbisu nu’udar Sekretáriu-Jerál Konsellu Musulmanu ba Ansião sira no Ko-Prezidente Relijiaun ba Pás.

Eis-asesór legál ba Grande Imam Al-Azhar, nia mak musulmanu árabe dahuluk ne’ebé simu Ordem Papa Pio IX Komandante Kavaleiru husi Papa Francisco.

Juíz Mohamed Abdelsalam simu Kolár Ordem Timor-Leste tuir Dekretu Prezidente Repúblika Nú.134/2026, nu’udar rekoñesimentu ba ninia papél signifikativu iha promosaun valór fraternidade umana, diálogu inter-relijiozu, toleránsia, koezisténsia pasífika, no aprosimasaun entre povu no kultura sira.

Ninia servisu kontribui ona ba dezenvolvimentu inisiativa internasionál sira ne’ebé ho objetivu atu hametin koezisténsia pasífika entre komunidade relijioza oioin, defeza direitus umanus no liberdade relijioza, no harii sosiedade sira ne’ebé justu liu, inkluzivu no apoiu. ***

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!