Prokuradoria Jerál Repúblika Portugal Envolve iha Reforma Justisa Timor-Leste

PM Kay Rala Xanana Gusmão, hala’o enkontru ho Prokuradoria Jerál Repúblika Portugal.

Lisboa, 24 Juñu 2026 (RAFA.TL) – Primeiru-Ministru (PM), Kay Rala Xanana Gusmão, hala’o enkontru ho Vise-Prokuradór Jerál Repúblika Portugal no ekipa funsionáriu Ministériu Públiku sira iha kuadru fortalesimentu kooperasaun bilaterál iha seitór justisa.

Enkontru ne’e kontinua diskusaun sira ne’ebé hala’o ho Supremu Tribunál Justisa Portugal, maibé fó atensaun liu bá papél Prokuradoria Jerál Repúblika nian, inklui Ministériu Públiku, ajentes justisa, advogadus no defensoria públika.

Komunikadu ne’ebé Rafa.tl asesa revela katak PM Xanana konsidera kooperasaun ho Prokuradoria Jerál Repúblika Portugal importante tebes bá fortalesimentu sistema justisa iha Timor-Leste.

“Presiza hametin kapasidade Defensoria Públika hanesan parte importante ida atu garante sidadaun sira bele asesu bá justisa,” Xanana hateten.

Kay Rala Xanana Gusmão refere katak iha kazu balun, uluk iha maneira atu trata prosesu sira ne’ebé la tuir didi’ak prinsípiu Estadu Direitu Demokrátiku, tanba ne’e presiza asegura katak prosesu justisa sira tenke tuir prosedimentu klaru, transparente no justu.

Iha enkontru ne’e, parte Portugés sira manifesta disponibilidade atu kontinua fó apoiu bá Timor-Leste liu-hosi kooperasaun ho Ministériu Justisa Timor-Leste, ne’ebé lidera hosi Ministru Sérgio da Costa Hornai, no mós ho Koordenadora Grupu Traballu Reforma Justisa, Lúcia Lobato.

Parte sira konkorda atu fortalese komunikasaun no kooperasaun institusionál, liu-liu iha área formasaun majistradu Ministériu Públiku, investigasaun kriminál no partilla esperiénsia profisionál sira.

“Diálogu kontinua entre instituisaun judisiária Timor-Leste ho Portugal sei ajuda atu garante programa kooperasaun sira sai efetivu no responde bá nesesidade reál sira iha sistema justisa Timor-Leste nian,” Xefe Governu ne’e subliña.

Portugal reafirma prontidaun atu kontinua apoia reforma seitór justisa Timor-Leste, liu-liu iha área fortalesimentu instituisaun, formasaun profisionál no konsolidasaun Estadu Direitu Demokrátiku.

Jornalista: Zita Menezes/Editór: Vito Salvadór