Projetu Suai Supply Base Hein Aprovasaun Finál Husi CNA

Ministru Planeamentu no Investimentu Estratejiku (MPIE), Gastão Francisco de Sousa.

Díli, 13 Jullu 2026 (RAFA.TL)- Ministru Planeamentu  no Investimentu Estratejiku (MPIE), Gastão Francisco de Sousa, informa projetu Suai Supply Base iha ona Komisaun Nasionál Aprovizionamentu (CNA) hodi hein aprovasaun finál no hakat ba implementasaun.

“Suai Supply Baze iha ona fase finál aprovisznamentu. Sei iha pontu balu ita tenke aselera lai antes lori ba Konsellu Ministru,’’ MPIE Gastão Francisco de Sousa informa hodi responde jornalista sira, Segunda-ne’e.

Governante ne’e haktuir, pontu balu ne’ebé ministériu tenke finaliza maka hanesan orsamentu, no kestaun seluk ne’ebé maka Ministeriu Presiza aselera antes atu submete ba iha Konsellu Ministru.

Mandatu IX Governu Konstituisionál sei hela tan tinan rua,  tuir Ministru Gastão de Sousa katak Governu  garante projetu Suai Supply Base sei bele hala’o bainhira hetan ona aprovasaun husi Komisaun Nasionál Aprovizionamentu. Tanba projetu boot tenke halo di’ak, tanba governu gasta osan kuaze sentenas  millaun tanba ne’e maka ministériu tenke prepara halo didi’ak molok atu hahú projetu refere.

“Se agora iha ona faze finál aprovizionamentu, ha’u espera bele asina kontratu para bele ezekuta, ida ne’e ita hotu nia esperansa,’’ Ministru  Gastão de Sousa hateten.

Antes ne’e mos governu autoriza ona despeza projetu Tasi Mane ho montante $40,500,000.00 ba iha projetu rua maka hanesan Auto Estrada husi Zumalai ba Natarbora no Suai Supply Base.

Tuir informasaun ne’ebé Rafa.tl asesu iha Portal do Governu, loron 28 Fevereiru 2024, Timor GAP, E.P indeminiza ona komunidade ho rai ektare 414 ne’ebé afeta ba iha  instalasaun Projetu Suai Supply Base

Indeminizasaun ne’e halo ba abitante sira iha Aldeia Sanfuk no Fatuisin, iha Suku Camanasa, Postu Administrativu Suai, Munisípiu Covalima, ne’ebé rai kada ektare selu $30,000.00 no tuir time line ne’ebé iha, dezenvolvimentu ba greater sunrise ba faze konstrusaun iha 2027, enkuantu Timor-Leste nia Projetu Suai Supply Base, hotu iha fim do ano 2026 no tarde liu maka 2027.

Projetu Suai Supply Base ne’e importante tebes ba Timor-Leste tanba nia sai pilar lojístika Prinsipal ba desenvolvimentu Industria Pétroleu no  gás iha Kosta Sul no nu’udar mos infrastrutura xave ida hodi hametin, negosiasaun atu dada kadoras Mina husi Kampu Greater Sunrise .

Jornalista: Remigia Licatelli/Editór: Vito Salvadór