Projetu Igreja Aimutin Paradu Dezde 2019, Vise-PM Mariano Assanami Garante Finaliza iha Mandatu IX Governu Konstitusionál

Kondisaun infraestrutura Igreja Aimutin, Díli.

Díli, 27 Agostu 2026 (RAFA)-Vise-Primeiru-Ministru no Ministru Koordenadór ba Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, konfirma prosesu audit ba konstrusaun Igreja Aimutin remata ona, nune’e nia fó delegasaun ba Gabinete Apoiu Sosiédade Sivil (GASC, sigla portugés) hodi rezolve problema no garante obra ne’e tenke remata iha mandatu IX Governu Konstitusionál.

“Ha’u hakarak ema hotu-hotu, ha’u nia ukun ne’e labele halo fali kastigu ema, ha’u nia ukun la’ós atu fó sala ema. Ukun atu povu ne’e kontente, povu ne’e hamnasa, ne’ebé karik iha buat ruma tur hamutuk atu hadia, tanba ha’u nia objetivu Igreja Aimutin tenke hotu,” Vise Primeiru Ministru no Ministru Dezenvolvimentu Rurál no Abitasaun Komunitária, Mariano Assanami Sabino ba jornalista sira bainhira partisipa reuniaun Komité Revizaun Polítika Orsamentu Jerál Estadu 2027 iha Ministériu Finansas, Kinta-ne’e.

Governante ne’e argumenta, la’ós problema se mak sala, ne’e depois Komisaun Anti-Korrupsaun (CAC) iha aban bainrua CAC mak sei pronúnsia no Tribunál iha atu haré. Maibé, hakarak mak ne’e, Igreja Aimutin tenke hotu, ne’ebé tur hamutuk ba, tanba fó ona delegasaun ba Koordenadór Jerál Gabinete Apoiu Sosiédade Sivil, Joaquim Freitas atu resolve, depois mak nia relata mai rezolve oinsá.

Assanami hateten Governu nia alvu mak ne’e, dalan hotu-hotu mais Igreja Aimutin tenke hotu iha ukun ida ne’e. Maibé, ajusta no konsidera falla ne’e iha ne’ebé, atu rekonsilia dadus, se mak gasta liu ka se mak seidauk gasta mak tenke ceking ba kuitansia sira buat hotu-hotu no tenke halo kontinua halo Igreja Aimutin ne’e hotu ida ne’e mak importante.

Vise-Primeiru-Ministru informa mos katak ekipa hotu-hotu iha laran, kompostu husi GASC, Igreja Katólika, ADN sira  hamutuk atu haree, mais antes Igreja Aimutin ne’e nia relatóriu mós mai, ADN nia relatóriu mós mai atu bele rekonsilia dadus sira ne’e mak husi ekipa ne’ebé lidera husi Koordenadór GASC, depois mak sei informa.

“Relatóriu seidauk simu, GASC mós hein atu relata mai ha’u, mais ha’u sei okupadu hela, parese semana oin, tetu orsamentu hotu, ha’u husu atu GASC relata,” Assanami konklui.

Projetu Igreja Aimutin Hahú iha tinan 2015

Prpojetu Igreja fiun Aimutin hahú lansamentu fatuk-inan iha loron 28 fulan-Maiu  tinan 2015, husi Primeiru-Ministru (PM), Rui Maria de Araújo ho proposta orsamentu  inisiál millaun 5.1 USD ho nia postura Igreja modernu no multi-funsaun.

Proposta orsamentu inisiál ba konstrusuan Igreja ne’e hetan kortes husi Ajénsia Dezenvolvimentu Nasionál (ADN) tempu ne’ebá lidera hosi Diretór Jerál Samuel Marcal, hodi prevee fali orsamentu avaliasaun hosi ADN nian 4,859.540.81 USD.

Dezeñu 3D ba projetu konstrusaun Igreja foun Aimutin nian ne’e ho medida luan 5167 metru kuadradu hosi basement  to’o balkaun.

Iha basement  ne’e sei prepara fasilidade hanesan, loja, armazén, kartóriu parókia, kapela ida tan, aula ne’ebé bele akomoda ema 400-500 no   iha mós fatin ba meditasaun

Iha leten to’o balkaun misa fatin ho akomoda sarani 1,200. Igreja ho nia aprezentasaun arkitetura kombinasaun tradisionál ho modernu ne’ebé nia valor relójiu ne’e mosu tanba ne’e Igreja ne’e karik hotu, bele dehan  hanesan íkone ida ba Timor-Leste hodi reprezenta sarani Timor nia fiar ba mundu.

Pagamentu ikus ba projetu Igreja Aimutin husi Governu purvolta milaun 2.5 USD iha fulan-Novembru 2019. Maibé projetu ne’e paradu total iha fulan-Dezembru 2019 tanba orsamentu restu hela de’it ona 480,000.00 USD iha hela Governu liuhosi Gabinete Apoiu Sosiedade Sivíl (GASC, sigla portugés).

Jornalista: Cristina Ximenes