Produtu Ne’ebé Exporta Presiza iha Sertifikadu Orijen Husi MCI

Diretór Jerál Indústria, Jorge Ferreira.

Díli, 9 Setembru 2026 (RAFA)  – Ministériu Komérsiu no Indústria (MCI), liu husi Diresaun-Jerál Indústria, apela ba grupu indústria no emprezáriu lokal sira atu asegura katak produtu ne’ebé sira exporta ba nasaun seluk presiza iha sertifikadu orijen husi MCI.

Diretór Jerál  Indústria, Jorge Ferreira,  Tersa-ne’e, iha Díli, hateten sertifikadu orijen importante atu prova katak produtu ne’ebé exporta mai husi Timor-Leste.

“Ministériu husu ba emprezáriu lokal sira ne’ebé halo esportasaun produtu atu mai iha Direksaun-Jerál Komérsiu no Direksaun Nasionál Komérsiu Externu, atu hetan sertifikadu orijen,” Jorge Ferreira hateten.

Nia esplika sertifikadu ne’e importante atu evita situasaun ne’ebé nasaun sira  simu produtu husi Timor-Leste konsidera produtu ne’e hanesan produtu orijinál husi sira nia nasaun rasik.

“Ho sertifikadu orijen, ita bele define katak produtu ne’ebé ita halo exportasaun ne’e produtu Timor-Leste nian,” nia afirma.

Diretór Jerál ne’e mós  hateten MCI nafatin kompromete atu apoia grupu indústria sira ne’ebé iha planu atu exporta produtu ba Indonézia no nasaun sira seluk no prontu atu fasilita prosesu sertifikasaun ba emprezáriu no grupu indústria sira. Se iha dokumentu ruma ne’ebé seidauk kumpre rekozitu, MCI sei ajuda rezolve difikuldade sira ne’ebé hasoru.

“Karik iha dokumentu balu ne’ebé seidauk prienxe rekizitu ruma, ami prontu atu rezolve sira nia difikuldade,” Jorge Ferreira subliña.

Nia mós haktuir to’o agora MCI apoia ona grupu indústria hamutuk 420, ne’ebé hala’o atividade negósiu no industrializasaun iha Timor-Leste.

Nia konsidera númeru ne’e seidauk sufisiente, maibé ida ne’e hatudu kompromisu MCI atu kontinua apoia grupu indústria lokal sira atu bele dezenvolve no aumenta sira nia kapasidade.

Grupu indústria sira ne’e, nia dehan kontinua hala’o atividade industrial no hetan apoiu husi MCI liu husi formasaun no asisténsia téknika, ho objetivu atu aumenta sira nia kapasidade kompetisaun ha merkadu nasionál no internasionál.

MCI liu husi unidade sira ne’ebé trata importasaun no exportasaun, servisu hamutuk ho grupu agrikultura sira atu promove no fasilita exportasaun produtu lokal, inklui kafé, kopra, kamí no vanila, ne’ebé iha merkadu iha nasaun sira seluk.

Nia hatutan, sei iha produtu lokal barak tan ne’ebé iha potensiál atu tama iha merkadu internasionál, maibé governu seidauk identifika no dezenvolve hotu-hotu ho di’ak.

MCI, liu husi Diresaun Komérsiu Externu kontinua servisu hamutuk ho emprezáriu no grupu indústria lokal sira atu asegura katak produtu Timor-Leste nian bele hetan rekoñesimentu no kompete iha merkadu internasionál.

Jornalista : Remigia Locatelli