Ouvir RAFA Ritmo, Voz e Coração de Timor
PR José Ramos-Horta distribui apoiu nesesidade báziku ba komunidade Suku Ossouala (Ossoala), Postu Administrativu Vemasse, Munisípiu Baucau, Tersa 27 Outubru 2026.
Baucau, 27 Outubru 2026 (RAFA)-Prezidente Repúblika, José Ramos-Horta vizita komunidade Suku Ossouala (Ossoala), Postu Administrativu Vemasse, Munisípiu Baucau.
Prezidente Repúblika, José Ramos Horta haree suku ne’e izoladu tebe-tebes, hanesan Xefe Suku rasik fó hatene tiha ona, ne’e do’ok la besik obrigasaun Prezidente nian, obrigasaun governu nian atu haree no tau matan.
“Haree saida mak bele halo, tuir Prezidente nia kna’ar, la’ós atu harii eskola, hari’i biblioteka, Prezidente nia kna’ar la’ós atu dada bee-moos, atu halo irigasaun buat sira ne’e, maibé Prezidente buka sempre koordena governu, tane governu, tulun mós governu, buat balun Prezidénsia bele halo. Orsamentu ajuda mai husi nia amigu, kolega sira iha rai bara-barak, hanesan Japaun, Korea ka iha ne’ebé de’it sira ajuda programa Governu nian. Nune’e, ajuda ne’ebé fó ba Suku Ossouala ne’e kiik loos,” Prezidente Repúblika José Ramos-Horta hateten, Tersa-ne’e iha Ossouala.
Xefe Estadu sei informa no fahe situasaun iha Suku Ossoala ba Primeiru-Ministru, maibé Baucau sorti iha Prezidente Munisípiu ida matenek, feto ida esperiénsia iha Parlamentu no Governu.
Iha vizita ne´e, Prezidensia Repúblika fahe nesésidade bázika ba uma kain 400 iha Suku Ossouala.
Iha fatin hanesan, Xefe Suku Ossouala, Francisco Gama da Costa hatete, vizita Xefe Estadu nian ne’e atravesa husi whatsap ne’ebé nia manda vídeo ida, kona-ba konserva hela manu kakatua, nune’e Prezidente dehan iha tempu besik sei vizita fatin refere.
Autoridade lokál ne´e haktuir iha fulan-Jullu, la konsege, tenta nafatin, no ohin Prezidente mai to’o iha Suku Ossouala.
“Ne’e mak hanesan ohin imi rona Prezidente nia diskusaun tanba laiha informasaun klaru, la konsege to’o iha kakatua nia fatin,” hatete Xefe Suku Francisco Gama da Costa.
Komunidade Suku Ossouala ne’e izoladu mak barak tebes, hanesan Prezidente mai atu hatene katak, Ossouala ne’e parte ida Postu Administrativu Vemasse, Munisípiu Baucau.
Benefisiáriu Ema ho defisiensia matan, husi Suku Ossouala, Ricardo da Costa sente kontente simu foos, mina husi Prezidente Repúblika.
“Hanesan ohin ami simu foos, mina husi Prezidente, ami kontente loos, tanba primeiravez mak fahe ba ami defisiensia sira,” hatete Ricardo da Costa.
Hanesan defisiensia matan husu, liu-liu mak Prezidente bele tau matan konstrui uma dignu ida ba nia hodi hela.
Prezidente Autoridade Munisípiu Baucau, Veneranda Lemos hatete, vizita ida ne’e Prezidente Repúblika ninian, vizita ofisiál mai Suku Ossouala, Postu Administrativu Vemasse, Munisípiu Baucau, atu mai haree diretamente komunidade sira ne’ebé moris no hela iha Ossouala.
Nia esplika, Prezidente nia programa hanesan baibain asaun sosiál ne’ebé Prezidente halo, kontaktu ho Xefe Suku atu fahe nesésidade báziku, ne’ebé Prezidente halo iha fatin-fatin, la’ós de’it iha Suku Ossouala. No iha fatin-fatin lori mós nesésidade báziku hodi fahe ba komunidade sira, fahe mós bola, roupa jogu nian ba joven sira.
“Ohin mós komunidade sira, liu husi labarik kiik oan sira, no mós Xefe Suku hato’o sira nia preokupasaun balun ba Prezidente ne’e normál,” nia hatutan.
Nia argumenta Prezidente hanesan simbólu no aman nasaun ninian, bainhira mai vizita komunidade sira, labarik sira, hato’o sira nia preokupasaun.
Asesor Sosiedade Sivíl, Prezidente Repúblika, Quintiliano Moniz Carvalho esplika, apoiu nesésidade báziku ba komunidade sira hahú husi mandatu 2022 to’o 2026, iha 15 mill família benefisiáriu.
PR mós apoiu orfonatu sira halo reabilitasaun, halo mós uma ba família vulneravel sira husi 2022 to’o agora, hamutuk uma 41 mak Prezidensia Repúblika halo.
Jornalista: Cristina Ximenes
Written by: RafaFM
Prezidente Repúblika Vizita Komunidade Suku Ossouala
todayNovember 20, 2026 11 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt