Prezidente Repúblika Simu Kredénsial husi Embaixadór Estraordináriu no Plenipotensiáriu Foun Malázia Mai Timor-Leste

Embaixadór Estraordináriu no Plenipotensiáriu foun Malázia nian mai Timor-Leste, Fairuz Rozali entrega karta kredensiál ba PR José Ramos-Horta, Tersa 21 Jullu 2026. Imajen/Mídia GPR

Díli 21 Jullu 2026 (RAFA.TL)- Prezidente Repúblika (PR), José Ramos-Horta, Tersa-ne’e, iha Palásiu Prezidensiál, simu Karta Kredénsial husi diplomata Fairuz Rozali, nu’udar Embaixadór Estraordináriu no Plenipotensiáriu foun Malázia nian mai Repúblika Demokrátika Timor-Leste.

Timor-Leste no Malázia iha parseria ne’ebé kleur, hahú iha Malázia nia apoiu sira antes ba nasaun. Malázia nu’udar nasaun dahuluk ne’ebé estabelese gabinete ligasaun ida iha Díli iha 13 Abril 2001. Hahú husi ne’ebá, Malázia sai nafatin parseiru ne’ebé metin iha Timor-Leste nia esforsu harii nasaun no dezenvolvimentu, kontribui liuhusi inisiativa kapasitasaun no seguransa hanesan Programa Kooperasaun Téknika Malázia (MTCP) no Programa Kooperasaun Defeza Malázia (MDCP).

Kooperasaun bilaterál hametin liután liuhusi akordu formál sira iha servisu aéreu, ensinu superiór, telekomunikasaun, dezenvolvimentu informasaun no mídia, dezenvolvimentu rurál, no defeza. Marku istóriku ida iha relasaun bilaterál sira maka Timor-Leste nia admisaun formál nu’udar Estadu-membru ASEAN ba dala 11 iha loron 26 Outubru 2025, durante Prezidensia ASEAN Malazia nian.

“Ha’u kontente tebes atu simu Embaixadór Fairuz Rozali iha Timor-Leste. Malázia sai hanesan parseiru loloos iha ita-nia jornada dezenvolvimentu, hahu husi ita-nia independénsia to’o ita-nia adezaun ba ASEAN. Ha’u laiha dúvida katak iha ninia lideransa, ita-nia ligasaun bilaterál sira sei sai metin liután, hodi loke oportunidade foun sira iha komérsiu, kapasitasaun, no kooperasaun rejionál ba benefísiu ita-nia nasaun rua nian,” Prezidente Repúblika José Ramos-Horta hateten.

Xefe Estadu manifesta ninia konfiansa tomak katak mandatu Embaixadór Fairuz Rozali nian sei eleva no hametin lasu amizade no kooperasaun ne’ebé dura entre Timor-Leste no Malázia.

Embaixadór Fairuz Rozali lori esperiénsia diplomátika liu dékada rua ba ninia knaar foun. Desde nia hola parte iha Servisu Administrativu no Diplomátiku Malázia nian iha 2002, nia serbisu ona iha pozisaun xave sira iha Ministériu Negósiu Estranjeiru, inklui destakamentu sira iha Sekretariadu Nasionál ASEAN-Malázia, Departamentu Koordenasaun no Implementasaun, OIC no Divizaun Kooperasaun Rejionál, no Divizaun Polítika Multilaterál. Ninia knaar sira iha rai-li’ur inklui misaun sira Malázia nian iha Kuwait, Repúblika Koreia, no Estadus Unidus Amérika. Foin lalais ne’e, nia hala’o kna’ar nu’udar Adjuntu Diretór-Jerál Divizaun Relasaun Esterna ASEAN nian iha Sekretariadu Nasionál ASEAN-Malázia molok hetan nomeasaun ba Timor-Leste. Embaixadór Fairuz Rozali iha Lisensiatura iha Relasaun Negósiu Internasionál (Hons) husi Universiti Utara Malaysia no Mestradu iha Asuntu Internasionál (ho méritu) husi Universidade Nottingham.

Jornalista: Remigia Locatelli/Editór: Vito Salvadór