Prezidente Repúblika Rekoñese Taxa Pobreza iha Timor-Leste Sei Aas Tebes

Prezidente Repúblika, José Ramos-Horta rekoñese taxa pobreza iha Timor-Leste aas tebes.

Díli, 07 Setembru 2026 (RAFA)-Prezidente Repúblika, José Ramos-Horta, rekoñese katak taxa pobreza iha Timor-Leste sei aas tebes, maibé nia otimista katak kreximentu ekonómiku, inflasaun ne’ebé kiik no kria empregu mak xave atu hamenus númeru ne’e.

“Ita-boot sira (jornalista-red) buka kedas buat ne’ebé negativu. Pur ezemplu kreximentu ekonómiku tinan ida ne’e sei to’o 5%. Segundu, haré mós ba iha relatóriu ne’e mortalidade infantil tun lubuk ida. Dezempregu tun, inflasaun 0.4%,” Prezidente Repúblika afirma hodi responde jornalista sira iha Portu Díli, Segunda-ne’e.

Nia esplika, pobreza ne’e hatene kleur tiha ona ne’e mós tun, haré servisu bara-barak, obra sira iha Díli laran ne’e se mak servisu iha ne’ebá, rihun ba rihun iha Díli laran, iha foho, ne’e Timor-oan mak servisu manan vensimentu, sira servisu la saugate, ne’e mak dezenvolvimentu. Maibé, Ramos-Horta hateten buat pobreza ne’e lori tinan hira tan mak bele rezolve, ne’e la’ós hanesan tanba ohin ka tanba tinan kotuk mai sei lori tinan lubuk ida.

Nia afirma, saida mak atu ajuda pobreza ne’e tun, empregu ne’ebé halo daudaun ne’e Sentru Konvensaun foun atu halo iha Portu Díli  sei emprega ema lubuk ida.

Relatóriu husi Banku Mundiál, Macro Poverty Outlook, edisaun fulan-Abríl 2026 rejista katak taxa pobreza ka kiak iha Timor-Leste sa’e ba 71,7%. Númeru ne’e koloka Timor-Leste iha pozisaun dahuluk ho taxa kiak ne’ebé aas liu entre nasaun 11.

Jornalista: Cristina Ximenes/Helio dos Santos