Prezidente Repúblika Kondekora Direitór Jerál no Eis-Direitór Rejionál OMS ho Grau Kolar Orden Timor-Leste

Prezidente Repúblika, José Ramos-Horta, kondekora Diretór-Jerál Organizasaun Mundiál Saúde Doutor Tedros Adhanom Ghebreyesus no Eis-Diretór Rejionál Organizasaun Mundiál Saúde ba Sudeste-Aziatiku Doutor Poonam Khetrapal Singh ho Grau Kolár Orden Timor-Leste, Segunda 07 Setembru 2026.

Díli, 08 Setembru 2026 (RAFA)- Prezidente Repúblika, José Ramos-Horta, kondekora Diretór-Jerál Organizasaun Mundiál Saúde Doutor Tedros Adhanom Ghebreyesus no Eis-Diretór Rejionál Organizasaun Mundiál Saúde ba Sudeste-Aziatiku Doutor Poonam Khetrapal Singh ho Grau Kolár Orden Timor-Leste hodi fó rekonesimentu ba sira nia kontribuisaun valiozu sira iha área saúde ne´ebé fo impaktu pozitivu ba Timor-Leste.

Serimónia kondekorasaun ne’e hala’o durante jantar gala ne’ebé hala’o iha Palásiu Nobre iha Lahane, nu’udar parte hosi sesaun Komité Rejionál OMS nian ba dala-79.º.

Serimónia ne’e subliña Timor-Leste nia kompromisu kle’an ba parseria globál no valór komún kona-ba saúde, dignidade, no solidariedade umana.

Kondekora Grau Kolár orden Timor-Leste ba Doutor Poonam Khetrapal Singh tuir Dekretu Prezidente Repúblika No.102/2026, nu’udar rekoñesimentu ba ninia kareira distinta iha saúde públika iha nível nasionál no internasionál. Nune’e mós papél signifikativu ne’ebé hala’o durante mandatu nu’udar Diretora Rejionál Organizasaun Mundiál Saúde nian ba Sudeste Aziatiku hodi promove kobertura saúde universál, prevene no kontrola moras sira, hametin kapasidade atu responde ba emerjénsia saúde públika, no hasa’e kooperasaun ho Estadu-membru sira Rejiaun nian, partikularmente ho Repúblika Demokrátika Timor-Leste.

Tuir Dekretu Prezidente Repúblika No.103/2026, Prezidente Repúblika, José Ramos Horta kondekora Grau Kolar orden Timor-Leste ba doutor Tedros Adhanom Ghebreyesus, nu’udar rekoñesimentu ba ninia distintu kareira profisionál no institusionál no ninia papél signifikativu, nu’udar Diretór-Jerál Organizasaun Mundiál Saúde nian.

Tanba, iha lidera esforsu internasionál sira hodi promove saúde global, prevene no responde ba emerjénsia saúde públika, hametin sistema saúde no haburas kooperasaun internasionál. Ninia dedikasaun fó benefísiu ba ema barak iha tinan hirak nia laran, inklui sidadaun Timor-Leste no reprezenta kontribuisaun signifikativu ida ba umanidade ne’ebé merese hetan rekoñesimentu estadu nian.

Prezidente Repúblika José Ramos-Horta, iha komunikadu ofisiál ne´ebé RAFA asesu Tersa-ne´e haktuir ohin, bele oferese tan buat seluk: evidénsia kona-bá saida mak parseria bele alkansa. No apropriadu katak ita hahú ho rekoñesimentu ba pesssoal na’in-rua ne’ebé nia lideransa kontribui maka’as ba parseria ne’e.

Ramos-Horta hatutan Timor-Leste sente onradu konfere ba Doutor Tedros Grau Kolár Orden Timor-Leste nian, nu’udar rekoñesimentu ba lideransa ba Organizasaun Mundiál Saúde nian, ita-nia kontribuisaun ba saúde globál no servisu ba humanidade.

Doutor Tedros nia lideransa durante emerjénsia saúde grave balun iha nia tempu, ho kompromisu ba sistema saúde ne’ebé forte no esforsu hodi halibur nasaun sira fó benefísiu ba ema iha mundu tomak, inklui povu Timor-Leste.

Xefe Estadu hato’o nia esperansa katak onra ne’e sei inspira kooperasaun internasionál ne’ebé kontinua hodi harii mundu ida ne’ebé saudavel no ekuitativu ba ema hotu.

Ba Doutor Poonam Khetrapal Singh, Timor-Leste mós sente onradu hodi konfere ba nia ho Grau Kolar Orden Timor-Leste nian.

Nia esplika, durante dékada sira servisu públiku nian, no durante lideransa iha OMS Sudeste Aziátiku, defende kobertura saúde universál, sistema saúde ne’ebé forte, prevensaun no kontrolu ba moras, no preparasaun ba emerjénsia saúde públika.

Ita fortalese kooperasaun entre OMS no nasaun sira iha Rejiaun ne’e, sidadaun barak mak hetan ona benefísiu husi serbisu ne’e, no ohin loron Estadu rekoñese ita-nia servisu distinta. Onra sira-ne’e mós espresa Timor-Leste nia apresiasaun ba parseria ne’ebé hamutuk ho ami durante dékada rua resin.

Jornalista: Cristina Ximenes