Prezidente Repúblika Husu Timor-oan Kontinua Hametin Rekonsiliasaun no Unidade Nasionál

Prezidente Repúblika, José Ramos-Horta hato'o diskursu iha abertura kuarta sesaun lejislativa iha VI Lejislatura nian, Tersa 15 Setembru 2026

Díli, 15 Setembru 2026 (RAFA)- Prezidente Repúblika, José Ramos-Horta husu Timor-oan sira atu kontinua hametin rekonsiliasaun no unidade nasionál, ho rekoñesimentu ba istória pasadu no kompromisu atu labele husik kanek husi pasadu fahe tan jerasaun sira iha futuru.

“Rekonsiliasaun no Unidade Nasionál. Iha dimensaun ida husi ita-nia konstrusaun nasionál ne’ebé ita labele haluha: rekonsiliasaun. independénsia seidauk hamoos kanek hotu iha ita-nia istória,” hatete Prezidente Repúblika, José Ramos-Horta iha Parlamentu Nasionál, Tersa-ne’e.

Xefe Estadu hatutan, Timor-oan hotu tenke kontinua servisu atu nune’e Timoroan sira ne’ebé hela iha rai-li’ur, partikularmente iha territóriu viziñu sira, bele mantein sira-nia ligasaun ho sira-nia rai-doben no, bainhira sira hakarak fila, hetan kondisaun sira dignidade nian, seguransa nian no akollimentu nian.

Rekonsiliasaun la signifika haluha istória. Ne’e signifika rekoñese ida-ne’e, aprende husi ida-ne’e no impede ida-ne’e atu labele kontinua fahe jerasaun sira iha futuru. No unidade nasionál la ezije atu ema hotu-hotu hanoin ho maneira hanesan. Ida-ne’e ezije atu rekoñese katak pertense ba Nasaun ida de’it.

Prezidente Repúblika fundamenta katak dame, fraternidade umana no edukasaun ba toleránsia importante hanesan dame ne’ebé Timor-Leste defende iha nivel internasionál tenke hahú mós iha komunidade rasik nia laran.

Enkuantu, iha espíritu ida-ne’e mak Timor-Leste buka promove valór sira Fraternidade Umana nian, iha liña Deklarasaun kona-ba Fraternidade Umana ba Dame Mundiál no Moris Hamutuk, ne’ebé asina iha Abu Dhabi, iha loron 4 fulan-fevereiru tinan 2019, hosi Sua Santidade Papa Francisco no Grande Imã Al-Azhar nian, Ahmad Al-Tayyeb.

Servisu Fraternidade Umana Prezidénsia nian promove ona valór sira-ne’e iha jerasaun foun sira, fó kontinuidade ba apoiu ba lansamentu Sentru Fraternidade Umana iha Timor-Leste iha tinan 2022, no ba inkluzaun dokumentu ida-ne’e iha kurríkulu eskolár Ministériu Edukasaun nian, ne’ebé implementa ona iha tinan 2023.

Tanba ne’e toleránsia, respeitu no fraternidade tenke sai parte ida husi kultura demokrátika ne’ebé transmite ba jerasaun sira iha futuru.

Jornalista: Cristina Ximenes