Prezidente Repúblika Garante Kombate Atividade Scam Call Centre iha Timor-Leste

Prezidente Repúblika halo vizita estadu ba RAEOA, Kuarta 12 Agostu 2026.

Oé-Cusse, 12 Agusto 2026 (RAFA)- Prezidente Repúblika, José Ramos-Horta, garante katak Polísia Nasionál Timor-Leste (PNTL), Polísia Sientifika Investigasaun Kriminál (PCIC, sigla portugés) hamutuk ho aparellu estudu iha área seguransa no defeza Timor-Leste nian halo servis maka’ás hodi kombate atividade ilísitu scam call centre.

“Ita nia seguransa Polísia no PCIC sira nia serbisu di’ak, kaer ema lubuk ida tiha ona, laiha impaktu ba Timor-Leste nian naran, tanba Timor-Leste nia índise mundiál kona-bá demokrasia kontinua númeru ida iha ASEAN no númeru 30 iha mundu. Liberdade imprensa mós di’ak no índise  korrupsaun mós tun iha nivel mundiál, ne’e diak,” Xefe Stadu hateten  hafoin vizita ikus iha Dapur Prezidente ba labarik sira iha Aldeia Nefobai, Lifau, Rejiaun Administrativu Espesiál Oé-Cusse Ambeno (RAEOA), Kuarta-ne’e.

Ramos-Horta hateten, jogu ilísitu sira ne’e ameasa, krime organizadu husi li’ur, krime organizadu ne’e barak los, la’ós Timor-Leste mak infrenta, maibé ne’e mai husi rai lubuk ida, viziñu sira, rai sira ne’ebe independente tinan atus ida tiha ona, iha Europa mós krime organizadu barak los.

“Estadu luta maka’ás los ba krime organizadu, Timor iha koperasaun di’ak ho polísia Federal Austrália, komperasaun di’ak ho Polísia sira iha ASEAN. Ha’u fiar neineik sei hamate sira hotu no sira sei tauk mai iha Timor-Leste,” Ramos-Horta hateten.

Scam Call Centre mak sentru telefone nian ne’ebé ema sira uza atu bosok ka engaña ema liu husi telefone, ho objetivu atu hetan osan, dadus pesoál, password, ka informasaun bankária. Tamba ne´e konsidera hanesan jogu Ilísitu no viola lei no konstituisaun sira ne´ebé vigora iha Timor-Leste.

MJ Garante PCIC Iha Kbiit

Iha sorin seluk, Ministru Justisa, Sérgio de Jesus Fernandes da Costa Hornai, konfrima katak Polísia Sientífika Investigasaun Kriminál (PCIC, sigla portugés) iha kbiit legál atu halo apreensaun no ezaminasaun ba objetu sira ne’ebé konsidera hanesan evidénsia krime, inklui objetu sira ne’ebé liga ho kazu scam call centre.

Ministru Sérgio de Jesus Fernandes da Costa Hornai ba jornalista sira iha Palásiu Governu, Díli, Kuarta-ne´e,  esplika katak kompeténsia PCIC nian importante atu ajuda autoridade investigadora deskobre faktu no verdade kona-bá kazu sira ne’ebé hela iha prosesu investigasaun.

“Ha’u hanoin PCIC nia kbiit duni atu halo deskoberta verdade ida, hodi nune’e, bele tulun sira nia matéria investigasaun ba Prokuradór-Jerál Repúblika,” Ministru Sérgio de Jesus Fernandes da Costa Hornai hateten.

Ministru Justisa subliña, kompeténsia PCIC importante atu asegura katak evidénsia sira ne’ebé hetan husi fatin kazu ka husi ema ne’ebé suspeitu bele sai baze ba prosesu investigasaun no, se presiza, ba prosesu jurídiku tuir lei.

Jornalista: Elio dos Santos/ Cristina Ximenes