Prezidente CNE Kompromete Eleisaun Prezidensiál no Poder Lokál La’o Transparante

Prezidente CNE, José Agostinho da Costa Belo Pereira, asina temru posse iha Parlamentu Nasionál, Sesta 02 Outubru 2026.

Díli, 02 Outubru 2026 (RAFA)-Prezidente Eleitu Komisaun Nasionál Eleitorál (CNE, sigla portugés), Agostinho da Costa Belo Pereira, kompromete kontinua prepara-an ho di’ak atu hala’o prosesu eleisaun prezidensiál no eleisaun poder lokál lao ho responsabilidade, transparénsia no dignu tuir Lei haruka.

Prezidente CNE, José Agostinho da Costa Belo Pereira ba jornalista sira iha ámbitu tomada posse ba mandatu daruak períodu 2026-2031 iha Parlamentu Nasionál, Sesta-ne´e, hatete, programa ne’ebé importante agora iha oin mak eleisaun prezidensiál sei akontese iha fulan-Marsu 2027, maibé agora prosesu la’o daudauk no hein Prezidente Repúblika dekreta data eleisaun tanba prosesu ida ne’e importante tebes.

“CNE prepara aan servisu ho di’ak, konsolida ho di’ak, nune’e ita bele lori sidadaun di’ak ba Aitarak Laran. Sidadaun Timor-oan hotu ne’ebé ho kualidade, servisu ho di’ak, tanba ita nia dezafiu sira boot ne’ebé ita hasoru agora, la’ós de’it kontestu ba Timor-oan de’it,” Prezidente eleitu  CNE, José Agostinho da Costa Belo Pereira hateten.

Nia hatutan Timor-Leste sei asume mós responsabilidade ba prezidénsia ASEAN  iha 2029 no Prezidente Repúblika ne´e mós mak sei lidera mós ASEAN, tanba ne’e presiza  servisu ho di’ak, prepara sidadaun ne’ebé di’ak, ba kompetente, nuune’e bele reprezenta Timor-oan tomak no sai líder ida nivél nasionál no mós nivél internasionál.

José Belo haktuir, eleisaun 2028, importante tebes tanba iha tranzisaun nia laran. Tanba iha 2029 sai hanesan afitraun no lidera mós ASEAN, tanba ne’e mak eleisaun ida ne’e mós hatudu katak, Timor-Leste nia prezensa no kontribuisaun, la’ós de’it sai hanesan membru pelenu ASEAN ba dala-11, maibé iha buat seluk ne’ebé mós bele kompara ho rai seluk, kapasidade ne’ebé Timor-oan sira iha, liu-liu órgaun sira ne’ebé importante oinsá dezenvolve no mantein nafatin prinsipiu demokrásia.

“CNE la ko’alia buat ida, sei halo servisu ho omilde, servisu ho pasiensia, servisu ho ema hotu-hotu, no servisu ba partidu hotu-hotu,”  José Belo afirma.

José Belo konfirma tan katak CNE la haré ba partidu iha kiik ka boot, maibé tratamentu hanesan, tanba tama ona ba iha urna, hotu-hotu komesa ho zero.

Nia lori CNE nia naran agradese ba partidu hotu-hotu ne’ebé fó ona konfiansa no konfiansa ne’e tau iha kabas, servisu ho di’ak durante tinan lima nia laran hodi servi interese públiku.

Jornalista: Cristina Ximenes