Prevene Moras, Presiza Ezersísiu Fiziku no Konsumu Ai-han Nutritivu

Ministra Saúde, Élia A.A dos Reis Amaral apela ba komunidade hotu halo ezersísiu fiziku no konsumu ai-han nutritivu.

Díli, 16 Setembru 2026 (RAFA) – Ministra Saúde, Élia A.A dos Reis Amaral, apela ba komunidade hotu atu moris saudável presiza ezersísiu fíziku regulár no konsumu ai-han nutritivu nu’udar medida importante atu prevene moras no hadi’a saúde públika.

“Ezersísiu fíziku tenke sai parte husi moris loroloron, tanba atividade fízika bele ajuda hadi’a saúde no prevene risku moras oioin,” Ministra Élia Amaral hateten Kuarta-ne’e, iha Palásiu Governu

Nia rekomenda ba komunidade hotu atu halo ezersísiu fíziku pelumenus minutu 30 kada loron, hanesan la’o, book-an ka atividade fízika seluk tan.

Ministra Saúde husu ba entidadi hotu atu halo ezersísiu, nune’e bele dook husi moras sira. Loron ida halo ezersísiu 30 minutu.

Aleinde ezersísiu fíziku, nia mós fó enfaze ba importánsia konsumu ai-han saudável no nutritivu, tanba ai-han la nutritivu bele fó impaktu negativu ba saúde.

Ministra Élia Amaral mós hateten katak prioridade Ministériu Saúde la’ós de’it atu trata ema ne’ebé moras. Maibé, mós atu haforsa prevensaun liuhosi investimentu iha rekursu umanu, fasilidade saúde no ekipamentu médiku.

“Primeiru lugar mak kapasitasaun no investimentu iha rekursu umanu. Depois segundu lugar ita haree ba fasilidade saúde ho ekipamentu sira ne’ebé favorese no kompleta diagnostiku, inklui ho servisu sira ne’ebé profisionál saúde sira halo iha terrenu,” Ministra Saúde hateten.

Nia relata kona-bá prevensaun moras liuhosi estilu moris saudável no fortalese sistema saúde presiza envolve parte hotu, hodi responde ba dezafiu saúde ne’ebé afeta komunidade.

Jornalista: Cesarina de Carvalho