Presu Kombustível Loron Ohin Nian iha Postu Abastesimentu Oioin iha Díli

Postu Abastesimentu Kombustível oioin iha Díli fa'an kombustível iha presu ne'ebé la hanesan. Imajen/Rafa.tl

DÍLI, RAFA.tl- Presu kombustível ne’ebé fa’an iha Postu Abastesimentu Kombustível sira iha Kapitál Díli  variable. Mézmu nune’e, maioria sei mantein ho presu gazolina entre US$1.33 to’o US$1.50 kada litru no gazóleu balun fa’an ho presu  entre US$1.45 to’o US$1.65 kada litru.

Notísia Relevante: Governu Aziátiku Sira Gasta Dolar Biliaun Hodi Kompensa Folin Kombustível

Tuir observasaun  Rafa.tl, Segunda (06/04/2026), iha Postu Abastesimentu Kombustível sira iha kapitál Díli, hahú husi ETO Taibessi fa’an ho presu gazolina $1.33 kada litru  no gazóleu US$1.45 kada litru, iha postu Abastesimentu sira iha área Kulu-hun nian fa’an gazolina  kada litru US$1.49  no gazóleu US$1.65 kada litru.

Iha Postu Abastesimentu Pertamina Internasionál Timor SA (PITSA) iha Bebora fa’an ho presu  gazolina kada US$1.50 no gazóleu US$1.65 kada litru.

Iha Postu Abastesimentu iha  área Hudi Laran, fa’an gazolina kada litru ho folin US$1.49 no gazóleu  mós kada litru US$1.49.

Postu Abastesimentu Kombustível iha Rai-Kotu, Comoro, fa’an gazolina kada litru US$1.45 no gazóleu US$ 1.55 kada litru.

Iha Estasaun Kombustível ETO iha Fatuhada (antigun estasaun kombustível Mira Mar) fa’an  gazolina kada litru  US$1.33 no gazóleu  US$1.45  kada litru.

Iha Postu Abastesimentu Kombustível Mega Fatuhada  presu ba gazolina US$1.49 kada litru no gazóleu US$1.65 kada litru.

Iha Postu Abastesimentu Bidiq Fatuhada presu gazolina kada litru US$1.45  no gazóleu US$ 1.55 kada litru.

Nota mós katak iha Postu Abastesimentu barak mak la hekerek presu kombustível iha sira nia kaudru apropriadu ruma hodi bele konsumidór sira atu hili presu kombustível ne’ebé tuir sira baratu oituan iha situasaun presu kombustível ne’ebé sa’e loron ba loron kauza husi funu iha Médiu Oriente.

Governu liu husi konsellu Ministru, Kuarta, 25 fulan-Marsu 2026, aprova ona projetu dekretu-lei ne’ebé estabelese medida temporária hodi estabeliza folin kombustível no garante seguransa ba fornesimentu iha Timor-Leste.

Diploma ne’e define limite másimu ba folin ne’ebé fa’an ba konsumidór. Hodi fiksa valór dólares Amerikanu 1.50 kada litru ba gazolina, dólar Amerikanu 1.65 kada litru ba gazoleu, Kombustível aviasaun nian (avtur) dolar Amerikanu 2,50 kada litru, no gas petrolíferu líkidu GLP) iha dólar amerikanu 4,2 kada kilograma.

Atu garante limite sira-ne’e, importadór sira ba oin tenke aprezenta kustu importasaun lolós. Ne’ebé sai hanesan baze hodi kalkula subsídiu ne’ebé Estadu se fó ne’ebé finansia liu hosi Orsamentu Jeral Estadu.

Dekretu-Lei ne’e prevé mớs medida sira hodi garante kontinuidade abastesimentu. Inklui definisaun estratejia importasaun nian ba kombustível esensiál sira. Iha koordenasaun entre entidades públikas no operadór sira setór ne’e nian, no mós posibilidade atu adota mekanizmu exepsionál sira ba regulasaun merkadu.

Kona-bá fiskalizasaun. Reforsa asaun hosi autoridade kompetente sira, ho atensaun espesiál hodi prevene dezviu kombustível sira ne’ebé hetan subsídiu atu sai hosi territóriu nasionál no aplika sansaun sira karik laiha kumprimentu.

Jornalista: Marito da Costa/Editór: Vito Salvadór