PR Realiza Palestra Prezidensiál Série IV Ho Tema “Embracing The Next World Order”

PR Ramos-Horta, realiza Palestra Prezidensial série IV ba tinan 2026 ho tema “Embracing The Next World Order” ne'ebé aprezenta oradór xave Dino Patti Djalal, diplomata no Eis-Ministru Negósiu Estranjeiru Indonézia, Sesta 14 Agostu 2026.

Díli, 14 Agostu 2026 (RAFA)- Prezidente Repúblika, José Ramos-Horta, Sesta-ne’e, kontinua realiza Palestra Prezidensial série IV ba tinan 2026 ho tema “Embracing The Next World Order”.

Objetivu  palestra prezidénsia ne’e atu análize realiñeamentu globál sira no nia impaktu iha Sudeste Aziátiku no iha mundu multipolar no haburas adaptabilidade estratéjiku atu harii reziliénsia, haforsa podér kmaan, no navega sistema multilaterál sira, no  envolve líder sira iha futuru liuhosi liga ema sira ne’ebé halo polítika, diplomata, akadémiku, no foin-sa’e sira iha diálogu kona-baádezafiu globál no estratéjia nasionál sira.

Oradór prinsipál ba Palestra Prezidensial série IV ne´e, Diplomata no Eis-Ministru Negósiu Estranjeiru Indonézia Dino Patti Djalal ne’ebé mós hanesan fundadór Komunidade Polítika Esterna Indonézia nian (FPCI).

Iha diskursu Dino Patti Djalal esplora oinsá estadu sira bele adapta ho konstrutivu no forma arkitetura globál ne’ebé evolui, hodi subliña imperativu atu simu mudansa estruturál envezde reziste ba sira.

Nune’e, ninia diskusaun kobre pozisionamentu estratéjika, solidariedade rejionál iha ASEAN nia laran, no papél krítiku husi juventude no akadémiku sira iha preparasaun ba orden mundiál tuirmai.

“Ita moris iha períodu ida transformasaun kle’an tebes. Orden mundiál antigu muda daudaun, no ita hakat ba ida foun ne’ebé nia forma seidauk define. Dezafiu ida ne’ebé ita enfrenta mak hetan ekilíbriu foun ida – la’ós ida-ne’ebé domina husi podér ida de’it, maibé ida-ne’ebé harii iha diálogu, kooperasaun no respeitu ba malu. Iha ne’e maka podér médiu sira iha nia papél importante ida atu hala’o, no iha ne’ebé ha’u iha esperansa boot iha jerasaun foin-sa’e sira,” hatete Dino Patti Djalal.

Diplomata Indonéziu ne´e hatutan orden mundiál iha futuru sei la’ós simplesmente hetan eransa, iha oportunidade atu ajuda forma ida-ne’e, inklui hodi imajina oinsá instituisaun sira hanesan Nasoins Unidas bele evolui hodi hasoru realidade sira mundu nian ne’ebé muda hela. No hanoin Maromak ne’e justu. Nia fó ona ba ida-idak rikusoin ida iha talentu, forsa no objetivu úniku ida.

Eventu ne’e halibur ofisiál governu nivel aas sira, ema sira ne’ebé halo polítika, membru Korpu Diplomátiku, akadémiku, Estudante no reprezentante juventude sira.

Sesaun ne’e modera husi Embaixadór Nelson Santos, Assessor Sénior ba Relasaun Internasionál no tuir ho segmentu husu no hatan interativu.

 Dino Patti Djalal simu kondekorasaun Kolár Orden Timor-Leste

Iha okaziaun Palestra Prezidensiál Série IV tina ne´e mós Prezidente Repúblika José Ramos-Horta, liuhosi Dekretu Prezidente Repúblika Nú. 90/2026, kondekora Dino Patti Djalal ho Kolár Orden Timor-Leste nian nu’udar rekoñesimentu ba ninia kontribuisaun sira ne’ebé destakadu ba diplomasia rejionál, relasaun internasionál, no kooperasaun pasífika.

Prezidente Repúblika, José Ramos-Horta, hato’o apresiasaun kle’an ba Diplomata Dino Patti Djalal ba ninia servisu nu’udar Enviadu Espesiál Timor-Leste nian ba ASEAN, ba hametin lasu amizade, kooperasaun, no solidariedade entre Timor-Leste no Estadu-membru sira ASEAN nian, ba nia dedikasaun ba nia knaar diplomátiku, no ba ninia esforsu sira hodi haburas relasaun sira ne’ebé besik liután entre Timor-Leste ho nasaun Sudeste Aziátiku nian sira.

“Ita mós rekoñese ninia kontribuisaun ne’ebé importante hodi promove Timor-Leste nia interese no pozisaun sira iha prosesu integrasaun ASEAN nia laran tomak liu husi fasilita kontaktu sira, hasa’e kompriensaun mútuu, no promove kooperasaun rejionál. Ita agradese tebes ba ninia servisu,” hatete Ramos-Horta.

Xefe Estadu esplika, Dino Patti Djalal antes ne´e halao knar hanesan Vise-Ministru Negósiu Estranjeiru Indonézia nian (2014) no Embaixadór ba Estadus Unidus (2010–2013).

Iha tinan 2004, nia hetan nomeasaun nu’udar Assessor Espesiál ba Prezidente Susilo Bambang Yudhoyono (SBY) ba Asuntu Internasionál sira, hodi hala’o knaar nu’udar Portavós Prezidensiál, Hakerek-na’in ba Diskursu, no Asesór Polítika esterna.

Doutor Djalal iha Ph.D. iha Relasaun Internasionál husi London School of Economics no nu’udar oradór proeminente ida kona-bá diplomasia, seguransa, no kooperasaun rejionál ho foku maka’as ba envolvimentu juventude no diplomásia sidadaun nian, hodi defende papél sosiedade sivíl iha formasaun debate globál sira.

 Jornalista: Cristina Ximenes