PR Ramos-Horta Denúnsia Tentativa Uza Nia Naran Ba Viajen ho Jet Privadu

Jet privadu ho tipu Cessna C700 tun iha Aeroportu Internasionál Prezidnete Nicolau Lobato, Kuarta-loraik, 02 Jullu 2026.

Díli, 02 Jullu 2026 (RAFA.TL) – Prezidente Repúblika, José Ramos-Horta, hatete katak nia halo ona denúnsia ba autoridade polísia Timor-Leste  ba suspeita uza nia naran hodi husu autorizasaun ba voo privadu (jet privadu) entre Jakarta no Díli, ne’ebé supostamente lori pasajeiru sira ba enkontru ho Xefe Estadu.

Kazu ne’e liga ba karta ida ne’ebé RAFA.TL asesu iha loron 30 Juñu foin lalais no haruka husi empreza Jetrans no dirije ba autoridade Timor-Leste, no husu autorizasaun ba viagem Cessna C700 to’o Díli.

“Pasajeiru sira ne’ebé mai no sei fila ho aviaun ne’e atu halo reuniaun ho Prezidente Repúblika Demokrátika Timor-Leste,” refere karta ne’e, asina husi Verry Kristiatna Saputra, Flight Operations Officer.

Dokumentu ne’e aprezenta detallu voo no informasaun kona-bá oras chegada no partida ne’ebé planeadu.

RAFA.TL la konsege asesu ba lista pasajeirus, maibé fonte investigasaun konfirma ba RAFA.TL katak ema na’in-tolu fila ho aviaun refere ba Jakarta.

Bainhira RAFA.TL husu kona-ba kazu ne’e, José Ramos-Horta dehan katak ema uza nia naran ilegalmente, nega halo enkontru ho ema sira ne’e, no hatete katak SNI no PCIC agora daudaun halo hela investigasaun ba kazu refere.

“Informasaun ne’e la loos. Hau la hatene buat ida. Atu hetan autorizasaun, ema balun hato’o informasaun la loos katak ema sira há’u mak konvida sira. Há’u hateten ona horseik katak há’u la koñese ema sira ne’e no há’u la haruka aviaunn ida mai”, hateten Xefe Estadu.

“SNI no PCIC hela halo investigasaun. Ba ema sira ne’ebé uza naran Prezidente Repúblika  nian tenke hetan julgamentu iha tribunál. No  tenke suspende kedas husi sira nia funsaun, se sira funsionáriu Estadu,” Ramos-Horta subliña.

Dadus FlightRadar hatudu katak Cessna C700 ho kode PKCAA, ne’ebé pertense ba empresa “Indonesia – Aviation Calibration Center (BBKFP)”, sai husi Jakarta iha 12:34, no to´o iha Díli iha 17:15.

Karta husi Jetrans dehan katak oras chegada estimada mai Díli mak 15:30 (06:50 UTC) no partida depois oras 3 liu, iha 19:20 (10:20 UTC).

Reportajen Ekipa Rafa.tl