PR Husu PN Lalika Preokupa ho Lei Kriminaliza Difamasaun Tanba Nia Sei Veta

Prezidente Repúblika José Ramos-Horta

Díli, 10 Juñu 2026 (RAFA.TL)- Prezidente Repúblika (PR), José Ramos-Horta, husu Parlamentu Nasionál  lalika preokupa ho lei kriminaliza difamasaun, tanba nia sei veta atu husik povu  Timor-Leste kontinua moris iha liberdade espresaun no liberdade imprensa.

Prezidente Repúblika José Ramos-Horta ba Jornalista sira iha Otél Timor, Kuarta (10/06/2026), husu ba Parlamentu Nasionál atu foku ba lei ne’ebé bele fasilita investimentu sira iha rai-laran no labele preokupa ho lei kriminaliza difamasaun.

“Tanba difamasaun ne’e la’ós mai husi de’it mídia, mai husi politikú sira ko’alia tuun-sa’e iha Parlamentu Nasionál, entaun poltikú sira bele halo akuzasaun oin-oin, inkluidu kontra Primeiru-Ministru no kontra Prezidente Repúblika ne’e difamasaun oin-oin, maibé sira iha imunidade, jornalista hakerek buat ruma ne’e labele iha imunidade,” Prezidente Repúblika José Ramos-Horta afirma.

Xefe Estadu hateten  Timor-Leste  kontinua  sai  nasaun ezemplu di’ak ba Liberdade imprensa no espresaun iha mundu tomak  tanba jovens no povu sira iha tinan hira ba kotuk luta, lubuk ida mate para hakarak sente liberdade loloos, Timor tenke kontinua ida-ne’e, ema barak iha mundu admira Timor-Leste liberdade no demokrásia di’ak loos.

Ramos-Horta  subliña tan karik bainhira lei kriminaliza difamasaun ne’e aprova iha Parlamentu Nasionál hodi haruka ba Prezidente Repúblika atu promulga, maka nia parte sei  haré no tetu didi’ak antes halo promulgasaun ba lei ne’e  rasik.

“Ha’u sei haré, saida loos mak sira haruka. Mas atu kriminaliza difamasaun husi mídia, ha’u la konkorda, sé hakarak difamasaun tenke hahú mós iha Parlamentu Nasionál kuandu Parlamentu rasik halo difamasaun, invéz ko’alia politiká ne’ebé di’ak ba rai, ko’alia tuun-sa’e halo akuzasaun balu-balu ne’e mós difamasaun. Sé sira hakarak ida-ne’e entaun ita sukat hotu didi’ak, maibé atu limita liberdade imprensa no espresaun, ha’u la simu,”  Ramos-Horta afirma.

Jornalista : Zita Menezes/Editór: Vito Salvadór