PR Agradese Atleta Rosa Mota Nia Partisipasaun iha Dili Internasionál Maratona 2026

Abertura expozisaun Díli Internasional Maratona (DIM), ne'ebé hala'o Palásiu Prezidensiál, Dili, Kinta 06 Agostu 2026.

Díli, 06 Agostu 2026 (RAFA) – Prezidente Repúblika (PR), José Ramos-Horta, agradese ba atleta Atletismu Senior Portugál, Rosa Maria Correia dos Santos Mota, ba partisipasaun iha Dili Internasionál Maratona (DIM) 2026 hanesan motivasaun atu enkoraja atleta atletismu Timoroan sira ba futuru.

Prezidente Repúblika hato´o agradesimentu ne´e iha ámbitu abertura expozisaun Díli Internasional Maratona (DIM), ne’ebé hala’o Palásiu Prezidensiál, Dili, Kinta-ne’e, hodi promove Veleza naturál sira Timor-Leste nian no aprezentasaun Gastronomia Tradisional Timor-Leste nian ba atleta, Turista no partisipante sira hotu ne´ebé sei involve eventu istoriku no internasionál DIM.

“Ha´u hakarak agradese ba Rosa Mota tanba mai fila-fali vizita Timor-Leste no partisipa iha eventu ida-ne’e. Rosa Mota mak atleta maratona mundiál ida ne’ebé ema hotu respeita. Ami konsidera nia hanesan konvidada onra ida. Ikus liu, bem-vindu ba atleta, família atleta, vizitante, turista no ema hotu ne’ebé mai fó entretenimentu. Ami hato’o agradesimentu kle’an ba imi hotu tanba imi-nia prezensa. Obrigadu barak,” Xefe Estadu hateten.

José Ramos-Horta  hatutan Dili Internasional Maratona ba edisaun tinan ne’e konsege atrai númeru rekordu partisipante no atleta husi rai oioin, ne’ebé reflete konfiansa komunidade internasionál ba kapasidade Timor-Leste atu organiza eventu desportivu ho padraun internasionál.

“Ohin, ami halo maratona ida tuir padraun internasionál, ho númeru rekordu partisipante. Atleta maratona barak mai husi Xina, nasaun sira iha Ázia, Austrália, expatriadu, rezidente iha Timor-Leste no atleta hotu partisipa iha eventu ida-ne’e,” Ramos-Horta tenik.

Prezidente Repúblika subliña Dili Internasional Maratona la’ós deit kompetisaun desportiva, maibé sai mós plataforma ida atu promove Timor-Leste ba mundu liuhusi desportu, turizmu, kultura no ospitalidade povu timoroan.

Dili Internasionál Marathon edisaun tinan ne’e envolve atleta rihun tolu liu ho kategoria full marathon sei partisipa husi atleta hamutuk 200 no half marathon (meia marathon) sei tuir husi atleta 400.

Jornalista : Marito da Costa