Polísia Tránzitu Díli Enfrenta Limitasaun Rekursu Umanu

Polísia Tránzitu halo atividade auto stop ho superviziona dokumentu no kondisaun transporte sira. Imajen/Espsesiál

Díli, 18 Agostu 2026 (RAFA) – Polísia Tránzitu Munisípiu Díli enfrenta dezafiu iha kontrolu tráfiku no transporte tanba limitasaun rekursu umanu, enkuantu númeru veíkulu no movimentu utilizadór estrada iha kapitál kontinua aumenta.

Notísia Relevante: Janeiru-Agostu, Asidente Tráfiku Rejulta Na’in-21 Lakon Vida

Limitasaun efetivu polísia bele afeta kapasidade autoridade sira atu hala’o patrullamentu, monitorizasaun no kontrolu iha pontu sira ne’ebé movimentu veíkulu aas, liuliu iha oras movimentu tráfiku aas.

Xefe Tránzitu Seksaun Munisípiu Díli, Superintendente Asistente Polísia Delfim da Silva, hatete kontrolu tráfiku presiza apoiu rekursu umanu sufisiente hodi asegura implementasaun regra Kódigu Estrada no aumenta seguransa ba utilizadór estrada.

“Ita menus rekursu tanba iha Tránzitu ne’e responde mós ba atividade operasional, bazeia ba atividade institusional no atividade eventuál sira. Dalaruma atividade governu nian mai halo ida ne’e, halo ida ne’eba, ita nia ema sira koloka hotu. Iha momentu ita la livre, ema aproveita para okupa estrada no ita labele halo atuasaun. Tanba ita nia rekursu fahe hotu, dalaruma komandante mós tun hotu atu fó apoiu,” Delfim da Silva informa ba RAFA iha Díli, Segunda-ne’e.

Polísia Tránzitu, aleinde kontrola konduta motorista sira mós iha responsabilidade atu responde ba kazu asidente tráfiku, halo investigasaun inisiál, organiza fluxu tráfiku no hala’o operasaun kontrolu iha estrada.

Limitasaun rekursu umanu bele sai dezafiu boot tanba iha tempu hanesan, polísia presiza hala’o servisu iha área no pontu estrada oioin. Situasaun ne’e bele halo difísil atu garante prezensa permanente iha área hotu-hotu ne’ebé presiza kontrolu.

“Ita iha membru efetivu hamutuk na’in-83, ita fahe servisu ba ekipa rua, ekipa ida tama dader no ekipa ida tama loraik. Depois ita koloka tan ba diresaun tolu: ida responde ba asidente, ida hamriik iha kruzamentu sira, no ida seluk fó apoiu ba foti evidénsia sira,”  nia esplika.

Xefe Polísia Tránzitu Munisípiu Díli ne´e esplika prevensaun asidente la depende de’it ba operasaun polísia, maibé presiza mós kooperasaun husi motorista no utilizadór estrada hotu. Motorista sira tenke respeita sinal tráfiku, limite velosidade, uza kapasete no evita uza telefone durante halo viajen no konduz kareta ka motorizada iha estrada públiku.

Polísia Tránzitu mós kontinua servisu hamutuk ho Direksaun Nasionál Transporte Terrestre, Direksaun Nasionál Seguransa Rodoviária no autoridade munisipál sira hodi reforsa kontrolu transporte no seguransa rodoviária.

Durante fulan-neen, husi  fulan-Janeiru to’o fulan-Agostu ne’e, Polísia Tránzitu Munisípiu Díli rejista kazu asidente tráfiku hamutuk 706, no husi totál kazu ne’e, ema na’in-21 lakon vida,  na’in-77 hetan kanek todan, no na’in-656 hetan kanek kmaan.

Jornalista: João Carlos