Polísia La Tolera Joven Sira Perturba Ordem Públika Durante Missa Tinan Foun 2026

PNTL halo operasaun la'o ain hodi asegura ámbinete hakmatek no pás iha selebrasaun loron natal, foin lalais ne'e. Imajen/Rafa.tl

DILI, RAFA.tl– Komandante Polísia Nasionál Timor-Leste (PNTL) Munisípiu Díli, Superintendente Xefe Polísia Orlando Gomes,  hateten ekipa konjunta ne’ebé kompostu husi PNTL no FALINTIL-Forsa Defeza Timor-Leste (F-FDTL) sei hasa’e tan volume seguransa hodi asegura  selebrasaun Missa kalan 31 Dezembru, hodi despede tinan tuan 2025 no simu tinan foun 2026.

Notísia Relevante: Polísia Asegura Sidadaun Na’in-20 Durante Natal

Komandante PNTL Munisípiu Díli, Superintendente Xefe Polísia Orlando Gomes, ba jornalista sira iha Sentru Konvensaun Díli (CCD, sigla portugés),  Segunda (29/12/2025) hateten, iha tinan foun no tinan tuan troka malu, missa kalan, sei hasa’e tan forsa operasaun hodi halo prevensaun tanba iha kalan Natal 204 Dezembru ne’e sai hanesan referénsia ida ba Polísia hodi identifika fatin sira ne’ebé mosu konflitu.

“Ekipa konjunta sei la tolera ba joven sira ne’ebé konsumu tua iha estrada ninin,  hodi halo barullu, bainhira hetan sei halo kapturasaun. Tanba ami sei implementa rigorozu uituan, hakarak iha kalan 31 Dezembru ne’e sidadaun hotu-hotu festeza ba tinan foun ne’e ho di’ak,” Superintendente Xefe Polísia Orlando Gomes afirma.

Komandante Polísia Munisípiu Díli  ne’e fó hanoin ba sidadaun sira hotu atu kontrola aan iha tinan foun, labele konsumu tua hodi kondus karreta no motór no bainhira  ekipa konjunta identifika sei halo apreensaun.

Nia hatutan, hafoin missa sidadaun sira sei ba paseiu tantu ba iha Kristu Rei, iha Liquiça no ba fatin sira ne’ebé liu-liu iha tasi-ibun iha kapitál Díli, tanba ne’e husi Unidade Polísia Marítima (UPM), Unidade Espesial Polísia (UEP) ne’ebé apóia mai Komandu Díli, iha loron 01 fulan-Janeiru 2026  bele garante seguransa, liu-liu koloka tránzitu sira iha fatin sira ne’ebé movimentu transporte ba mai, hodi bele garante situasaun siguransa movimentu nian la’o ho di’ak.

“Ba joven sira ne’ebé mak uza transporte, konsumu tual, ida ne’e mós husi tránzitu sei halo auto stop ka cek point hodi evita  mosu asidente. Bainhira identifika iis tua, sei prende karreta, labele husik liu hodi prevene di’ak ba sira nia aan no di’ak mós ba situasaun seguransa,” Superintendente Xefe Polísia Orlando Gomes hateten.

Superintendente Xefe Polísia ne’e subliña, Polísia Unidade Tránzitu mós nafatin  halo  operasaun ba kareta Estadu iha loron feriadu, atu labele halo movimentu hodi uza tula família.

Reportajen ekipa Rafa.tl