Polísia Konfirma Maioria Arguidu Kazu Scam Call Centre Nia Pasaporte Ema Seluk Mak Rekolla

Polísia transporta arguidu sira kazu scam call centre hafoin partisipa interrogatóriu dahuluk iha TJPID, Kinta 06 Agostu 2026.

Díli, 06 Agostu 2026 (RAFA) –Segundu Komandante Jerál  Polísia Nasionál Timor-Leste (PNTL), Komisária Assistente  Polísia, Natercia Eufasia Soares Martins, konfirma katak maioria husi sidadaun estranjeiru sira ne’ebé supeitadu ba atividade ilísitu scam call centre nia passaporte iha ema seluk mak rekolla ka ajensia ruma mak rai hela.

Ho informasuan ne’e, PNTL hein delegasaun kompeténsia husi Ministériu Públiku (MP) atu bele hahú investigasaun ba ajénsia sira ne’ebé suspeitu rekolla ka rai pasaporte sidadaun estranjeiru sira ne’ebé envolve iha kazu scam call centre.

“Durante prosesu ida ne’e, ami identifika katak maioria husi ema sira ne’ebé envolve iha krime ne’e laiha pasaporte. Balun dehan katak pasaporte iha ajénsia no balun iha advogadu. Maibé, ami seidauk buka tuir razaun tanba depois polísia kompleta ona autus no entrega ba Ministériu Públiku, ami sei hein delegasaun kompeténsia atu kontinua investigasaun,” Komisária Polísia Natercia Eufasia Soares Martins hateten hodi responde jornalista sira iha Díli.

Tuir nia delegasaun husi MP sei fó kbiit ba PNTL, liu hosi Diresaun Servisu  Investigasaun Kriminal (DSIK) ho Polísia Sientífika Investigasaun Kriminál (PCIC) atu halo investigasaun kle’an liután, inklui halo ezaminasaun ba evidénsia sira ne’ebé prende ona, liuliu buka hatene tanbasá mak pasaporte sira laiha arguidu sira-nia liman.

Tuir nia, investigasaun ne’e importante atu determina se iha indísiu kona-bá krime tráfiku umanu, eksplorasaun traballu ka forma seluk husi kriminalidade organizadu, no mós atu identifika ema ka entidade ne’ebé responsabiliza ba rekolla no rai pasaporte ema seluk nian.

Iha fatin hanesan, Portavóz Komandu Jerál PNTL, Superintendente Xefe João Belo dos Reis, esplika  durante operasaun sira, polísia hetan duni arguidu balun ne’ebé laiha pasaporte tanba entrega ba ema seluk atu trata visa no dokumentu seluk.

“Bainhira ami halo operasaun no hetan arguidu sira laiha pasaporte, ami kontaktu kedas Servisu Migrasaun atu buka tuir dokumentu sira. Iha kazu balun, sira uza parte terseiru atu trata sira nia dokumentu. Ami kontinua koordena ho Servisu Migrasaun atu rezolve problema ida-ne’e,”  Superintendente Xefe Polísia João Belo hateten.

Nia hateten, investigasaun sei buka klarifika se ajénsia sira limita deit ba servisu administrativu ba dokumentu viajen, ka iha indísiu katak sira mós envolve iha atividade ilegál, inklui fasilitasaun ba rede kriminal transnasionál.

PNTL husu mós ba ajénsia sira atu koopera ho autoridade sira, liuliu entrega dokumentu no informasaun relevante ne’ebé bele ajuda prosesu investigasaun.

Polísia reafirma katak ema hotu-hotu sei konsidera nafatin inosente to’o iha desizaun finál husi tribunál.

Jornalista: João Carlos