Polísia Investiga Xinés Ida Suspeita Kazu Scam Call Centre iha Karta Kondusaun Timor-Leste

Suspeitu ida ho nasionalidade Xina ba kazu scam call centre iha karta kondusaun.

Díli, 07 Agostu 2026 (RAFA)- Portavós Polísia Nasionál Timor-Leste (PNTL) Superintendente-Xefe Polísia, João Belo dos Reis, informa Polísia halo hela investigasaun ba sidadaun estranjeiru na’in-ida  nu’udár suspeitu rede scam call centre ne’ebé iha Karta Kondusaun Timor-Lest nian.

Iha operasaun ba kombate rede scam calla centre, Kinta-kalan, iha área Suku Bekari, Metiaut, Díli, ekipa konjunta detein sidadaun estránjeiru na’in-15, kompostu husi na’in-13  nasionalidade Xina no na’in-rua (2) nasionalidade Filipina.

Husi supeitu sira ne’e, iha na’in-ida ho nasionalidade Xina mak iha karta kondusaun  nu’udár motorista no pesoál lojistika ba suspeitu sira seluk iha atividade scam call centre.

Polísia identifika katak  Xinés na’in-ida nia  Karta Kondusaun Timor-Leste ne’ebé emitidu iha loron 05 fulan-Agostu 2026 no validu to’o  loron 05 fulan-Agostu 2031.

“Kinta-kalan, hale’u tuku 22:00 Otl, ekipa konjunta husi Diresaun Servisu Investigasaun Kriminal (DSIK) hamutuk ho Diresaun Servisu Informasaun Polísia (DSIP) no Servisu Migrasaun (SM) desmantela tan rede scam call centre ida iha Metiaut.  Operasaun flagrante delitu, detekta sidadaun estranjeiru hamutuk na’in-15,” portavoz PNTL, Superintendente-Xefe Polísia João Belo dos Reis, informa ba jornalista sira iha Kuartel Jerál PNTL, Sesta-ne’e.

Prova ka evidénsia sira ne’ebé autoridade seguransa rekolla    hanesan laptop, telefone , aparelu internet STARLINK rua no sasán sira seluk tan.

Dadaun  ne’e prosesu investigasaun ba kazu ida ne’e la’o hela no suspeitu sira  detein iha sela detensaun Komandu Polísia Munisípiu Díli durante  oras 72 nia laran molok aprezenta ba iha Tribunál.

Superintendente-Xefe Polísia João Belo dos Reis rekoñese, sidadaun estránjeiru na’in-ida ho nasionalidade Xina ne’ebé iha karta kondusaun Timor-Leste nian, sei halo verifikasaun  ba referénsia sira oinsá prodús karta kondusaun ba ema estránjeiru.

“Uma na’in ne’ebé fó aluga ba ema ne’e mós ita bolu ona para fó informasaun, no  ema ne’ebé aluga husi uma na’in mak, fó aluga tutan fali mós ita sei bolu hotu hodi foti sira nia deklarasaun hodi fortifika ba autos ne’ebé ita aprezenta ba iha Ministériu Públiku (MP),”  João Belo dos Reis hateten.

Autoridade seguransa sira kontinua halo koordenasaun ho parte Autoridade Nasionál Telekomunikasaun (ANC) atu bele regulariza aparelu STARLINK iha Timor-Leste.

Durante operasaun kombate atividade ilísitu scam call centre husi fulan-Juñu to’o agora, ekipa konjunta sira, kaptura  ona sidadaun estránjeiru hamutuk na’in-372 no aprezenta ona Tribunál.

Joranlista: Juvinal Cabral dos Santos